八

 

o camp結束左幾日了。

 

我坐左響屋張疏化，無無聊聊咁打緊winning eleven。順帶一提，果陣winning仲係比FIFA稍為受歡迎的。

 

我打機打到好入神既時候…

 

突然間電話響起，我心諗唔通係Jenny？但佢明明話今日佢會同佢個好姊妹高妹行街架喎。

 

我望一望來電顯示，原來係組媽Cathy。

 

「喂？」我拎起部iphone。

 

「阿威，黎緊我地下個星期諗住搞re u啊，你有冇邊日得閒呀？」Cathy問。

 

Re u簡單黎講其實即係o camp同組既全部人成班人出黎聚下。

 

都好，橫掂我呢條廢青都冇搵part time（屋企比既零用錢都夠晒數），基本上除左拍拖或者同啲豬朋狗友出黎hea下之外我都好得閒，而拍拖既時間又可以同Jenny夾，所以我其實應該咩時間都得。

 

而且，我都想見下阿冰同阿熙。

 

朋友果種掛念啫~朋友呀！

 

不過就唔係幾想見到獸父Simon。呃…不過出黎re u都冇計啦，唔通叫Cathy唔好叫埋佢咩。

 

「ok呀，我幾時都得。」我好爽快咁回答。

 

「好，咁我約好晒所有人同決定埋時間地點之後再通知你啦！」Cathy回答。

 

Re u嗎？我都真係幾期待添！

 

我響屋企繼續hea下，幾個鐘之後電話又響過。呢個鐘數應該唔係Jenny ，因為佢啱啱先sms我話佢仲同高妹行緊街，搵緊地方high tea。

 

我望一望部電話，原來係Cathy，佢打黎係話比我聽Re u既日期、時間同埋地點。嗯，效率真係幾快。

 

我估今次re u應該係Cathy做搞手。斷估Simon除左約女仔之外都唔會搞re u架啦。佢真係一個稱職既組媽。

 

「不過阿熙今次唔黎。」Cathy同我講，我feel到佢語氣入面有啲失落。

 

「下？佢有冇話點解唔黎呀？」不過唔好話淨係組媽失落，我而家聽到都有啲失落。始終我re u最想見到果兩個人，佢係其中之一。

 

「唔知呀…我又唔好意思問佢…」Cathy仲係有小小失落咁回答。然後佢有小小猶豫既語氣，問:「係呢…阿仔，我見你同阿熙響camp入面好似都傾得埋，你會唔會幫手問下佢係咪真係黎唔到？」

 

「？」咩料？組媽怕醜？

 

「呀，冇，我想全組人齊齊整整咁出現咋，冇乜特別架。」Cathy媽見我冇應佢，慌忙咁解釋。

 

唔，好可疑。唔通Cathy媽都係正太控？

 

「冇野啦，我都想佢黎，交比我啦。」其實我冇乜所謂啦，我又真係想佢黎。

 

不過話就話響o camp果陣傾得埋，但現實世界黎講我地都冇乜交集。

 

住既地方又唔算近。

 

唔理了，應承左Cathy就等我搵下阿熙啦。

 

「嗯，咁交比你啦仔。」Cathy媽語氣有小小感激。

 

「交比我啦。」我接下呢個任務了。

 

收線之後，我拎起個電話，準備打比阿熙。

 

*

 

「打工？」我打左比阿熙，佢話要返工所以黎唔到。「咁都唔係日日都要返架？你冇一日得閒架咩？」

 

「屌，你估我係你呢啲有錢仔咩。窮撚梗係要日鳩日都要開工架喇。況且之後要住hall，到時都唔知咩情況，有冇時間打工都唔知，好天賺埋落雨錢呀。」

 

我地讀嶺大，規定所有year 1都一定要住hall。

 

「你估我真係唔想黎，所以搵藉口日日都返工咩。」阿熙話。

 

Sor9ly，我有一刻真係諗過你會唔會係因為唔想見到隻獸父Simon所以搵藉口唔黎。

 

「冇得調更？」我問。

 

「又唔係冇既，請假都得添，不過我想搵下錢啫，出去re u又要洗錢。」阿熙答。

 

我有個念頭。

 

「不如果日我請埋你咪得囉？或者我貼埋比你等你過黎？」

 

咦？會唔會太hehe？點解好似啲出租男友咁既？

 

「痴撚線，我做乜要洗你啲錢？你包養我呀？我唔係基架！你個死基佬！」

 

喂，請你出去玩啫，唔好咁寸好喎。

 

嗯，或者轉個講法…

 

「唔係真係請，要還架。不過等開左學你下咩環境，真係ok先還比我啦。」我覺得自己開始有啲似好男色既痴漢。

 

「咁…」

 

「黎啦，Cathy媽都想你黎。」出動埋美人計。呃，雖然我講既都係事實。

 

「唔…」

 

「唔乜鬼吖，黎唔黎呀？」

 

「咁好啦。」阿熙比我半逼半就咁應承左會黎~

 

屌，成件事好撚基。

 

*

 

好快就到左re u果日。其實都只係閒日既一個星期四既夜晚響一間旺角樓上鋪cafe既聚會。

 

其實樓上cafe通常無論食物同飲料都係又貴又一般質素，不過叫做有個地方比大家玩之餘又唔駛理時間限制，仲多數會有層層疊飛行棋呢類益智遊戲提供。

 

我預早左10分鐘約埋阿熙，之後先一齊上去。其實本來有諗過好唔好約埋阿冰先，不過無端端約埋又好似怪怪地咁，所以都係由佢。

 

上到去其實好快大家都已經到齊。今次阿冰都遲左10分鐘左右。難得見到佢，但係佢一黎到獸父Simon就引領佢坐響自己隔離，屌。

 

咦，阿冰一黎到既時候，佢好似第一眼就係搵左我坐邊先，同埋好似第一個就係同我打招呼先。

 

應該唔係FF黎既。應該唔係…呱?

 

之後大家開吹水傾閒計。話題不外乎大學既生活、第一個sem應該揀咩科，同埋邊啲Lecturer/tutor係killers。

 

雖然獸父Simon唔太可靠，不過今日都全靠佢，Cathy同Alan分析左唔少建議比大家（可能佢只係想分析比啲組女聽，但又咁啱比我地聽到。），等大家對揀科揀老師都有返小小心得。

 

哎呀，阿冰同我坐得唔近，成晚好似冇乜交流添。

 

其實除左阿冰之外，好奇心旺盛既我仲有留意下疑似正太控既組媽Cathy有冇特別撩下阿熙傾計，又或者其他動作。可能現場太多人？佢除左好似有望多阿熙幾眼之外，對阿熙又好似對其他人冇乜唔同。

 

大家傾下計食下野咁，都開始悶悶地，於是獸父Simon提議玩下遊戲:「不如大家玩下非洲話事啤啦～」

 

（待續）