六十七
大家係咪好期待我會即刻同Jenny上床慶祝復合兼求婚成功呢？
Sorry呀，令大家失望了。
始終我啱啱先做完一件對Jenny唔住既事，咁快又同佢做愛個感覺好似有啲怪…
不過呢個唔係最大原因，最大原因係未來外父外母唔夠十分鐘之後就返左黎。
喂，又話啲時間交返比後生既，做咩咁快返入黎？
甚至乎我懷疑佢地根本就係企左響大門口度偷聽！
未來外父外母返左黎之後，我決定坦白咁將我向Jenny求婚既事話比佢地聽，亦都好含糊咁講左話我之前激嬲左Jenny搞到佢好唔開心，好對唔住。
我冇講到我扑左第二條女。
我懷疑到果一日果一刻外父外母依然認為我同Jenny係處男處女…
Jenny就響我旁邊一手拎住紥花，一手橋住我，一路聽我講，個樣笑到含春咁。
未來外父外母聽完之後其實就冇反對，始終佢地其實已經當左我係半粒仔，不過由於我同Jenny仲讀緊書，於是我地暫時決定會響大學畢業之後先至簽紙結婚。
我返到屋企之後同時將呢個消息講比兩老同細妹知。
兩老應該知知地我做錯事，於是語重心長咁同我訓話，要我一定要好好咁對Jenny。
至於細妹…唔好提啦，我以為講完之後我同佢既關係會好返。
但原來冇。
到而家都好似冇以前咁close。
我同Jenny既Facebook上面感情狀況一向冇顯示出黎，但今次為左令Jenny安心，我決定將求婚呢件事放上Facebook，於是我地既感情狀況就變左：Leung Kin Wai與Jenny Chan已訂婚。
好多人like左，但係我唔見阿冰有任何表示，不論係響Facebook定係現實，一句恭賀說話都冇同我講到。
其實，我咁樣奢望佢會向我道賀，對阿冰黎講，係咪好殘忍呢…
我唔知，因為我根本唔知佢愛我有幾深…可能果晚佢只係當我水泡都唔定…
不過我對佢既愛，應該唔會比Jenny少…甚至更多…
屌，唔講啦。
人生本來就係充滿住遺憾。
調轉黎講如果我同左阿冰拍拖，可能最後都係分手收場。
總之我同Jenny響大學畢業之後就即刻簽紙結婚，冇任何排場又冇擺酒，只係簡單咁簽紙，之後暫時響我屋企一齊住。
啱啱畢業既我地冇錢係最大既原因。
不過，著上婚紗既Jenny，笑得好甜好幸福。
咁就夠了。
我希望用一生既時間，令到Jenny幸幸福福。
我畢業之後首先做住份好普通既office工，但一路就準備投考消防隊長。
結果…
我係考唔到既。
我冇諗過考其他紀律部隊，因為我自己覺得做消防員好偉大，所以考唔到消防隊長就去考普通消防員。
今次一take pass。
Jenny就走左去教書，教英文。
其實佢同阿冰係同行。
我passing out之後，兩老好慷慨咁幫我同Jenny比首期響港島買左層樓，雖然層樓唔係新，但有個竇口比我地兩公婆住已經好好。
我啱啱先入職，就算要排消防宿舍都有排等。
我地兩個份糧加埋其實又唔算供得好吃力，反正我地暫時未諗住生小朋友住。
*
諗下諗下…
咦？屌，諗得太入神，原來阿熙佢地已經證完婚！
好戇鳩，今日我仲特登早左出黎睇佢地證婚添。
不過我硬住頭皮，扮晒有睇證婚咁走過去同阿熙道賀。
「簽左紙，你真係做左老襯啦！」我向阿熙道賀。
「屌你啦，你夠一早做左老襯咯。」阿熙屌返我。
「總之，恭喜晒啦！」我攬一攬阿熙。
「屌，死基佬。」把口就咁講，不過阿熙真係有回攬我：「好啦，你自便先啦，招呼唔到。」
「講呢啲。」
之後阿熙就鬆手走人。
*
我一條友百無聊賴咁坐響近門口張迎賓疏化度㩒電話。
踏…踏…踏…
好熟悉既腳步聲。
我停低滑手機既手，抬一抬頭。
好熟悉既身影。
一切好似返左去o camp果日，阿冰遲到果一刻。
我望住呢個身影既主人。
依舊美麗既黑長髮、依舊動人既面孔，著住條黑色連身裙。
梁冰冰。
冇見幾年，依舊咁美麗動人。
係好似…冇左果種好開朗活潑既氣質…
教書壓力大卦？
阿冰留意到我，對住我甜甜一笑。
我個心突左咁跳左一下。
深呼吸。
「證婚完左未？」阿冰快步走過黎咁問我：「我趕得切吖嗎？」
「完左啦。」我情不自禁咁拍一拍阿冰頭頂：「冇見咁耐，camp花都係咁鍾意遲到~」
「喂呀！」阿冰一手打落我手臂度，谷起塊面扮晒嬲：「死人頭camp草，咁耐冇見第一句就窒住晒！」
好熟悉又久違既感覺。
好似返到去未同阿冰做愛之前既對話咁。
「你簽到左同比左人情未呀？」我收歛一下心神，問阿冰。
「係喎，爭啲唔記得添！」阿冰好似比我一言驚醒洛克人，之後急急腳咁走過去接待處簽到同比人情。
我望佢既背影，不自禁咁發呆…
呆下呆下…望住阿冰簽完到返過黎…
「喂，你做乜呆左咁望住我呀？」阿冰古古惑惑咁望住我。
「我？冇呀，我望住你前面啲空氣咋嘛。」呢招我以前好似出過。
阿冰噗哧一笑：「點解你個人可以咁搞笑？」
我聳聳肩，不置可否。
「距離開席仲有小小時間…不如出去行陣？」阿冰提議。
「好呀。」
於是我地就出左商場行下。
肩並肩咁行。
「係呢…你最近好嗎？」我打破沉默。
「ok啦，學校都好忙下，好彩啲學生都唔算曳。」阿冰說道：「有時都幾大壓力架。」
「嗯。啱啱你好似都識新娘果邊既人？」
「呵呵，你應該唔知。」阿冰道：「我同新娘教同一間中學架。」
「而家咪知囉。」
然後阿冰沉默左一陣，再問：「咁你既生活呢？」
「冇嚴重火警就得啦。」我隨口答：「日子都過得還可以。」
我停左一停。
深呼吸，問左一個想知好耐既問題：「係呢…而家…你有冇拍拖呀？」
阿冰轉頭望住我，之後古古惑惑咁一笑：「你真係想知？」
我諗一諗。
…
…
…
我搖搖頭：「都係唔好比我知。」
不過，我收返大學畢業禮果陣既諗法。
如果你真係遇到一個對你好既人，我希望你可以同佢幸幸福福咁生活落去。
咁我都會好開心好滿足。
所以我繼續講：「唔理點都好…」我深呼吸，再好認真咁望住阿冰：「我希望你幸福。只要你能夠幸福，我自己都會覺得好幸福。」
阿冰抬頭望住我，甜甜一笑。
之後橋住我既手臂：「咁…借你手臂用一陣？」冇等我回答，就將頭挨埋落我手臂度。
我冇再出聲，繼續同阿冰行落去。
（我和一個o camp女女的故事 全文完）