五十四
我望住場邊既隊友頹然坐低，響陳sir附近集合，突然驚覺我都要落去聽賽後檢討，於是起一起身，同Jenny講：「我要落一落集合先，一陣再上黎搵你。」
「嗯。」Jenny笑一笑，點一點頭。
我起一起身，準備行落去。
Jenny突然拉住我隻手，我回一回頭，佢就衝上前攬實我，錫一錫我咀唇，道：「老公唔好咁唔開心，點都好，我都一定會陪住你既。以後都會陪住你。」
我心中有愧，點一點頭，勉強頂住心中既罪惡感錫返佢一啖：「好老婆。」
「咁我響度等你。」Jenny嫣然一笑。
唔尋常…
唔知點解我覺得今日既Jenny好唔尋常…
但其實我自己今日既表現都好唔尋常…
「以後要對你女朋友好啲呀。」
又來了，我用力搖一搖頭，之後收拾心情，向隊友們走去。
*
我落到去第一件事係同陳sir、隊友們道歉。
陳sir冇責怪過我，阿東、森遜、阿熙甚至司徒反而安慰返我轉頭，我今鋪真係無地自容了。
當然都有啲隊友有說話比我聽，咁冇計，我唯有扮聽唔到。
I deserve。
同上次輸比理大唔同，今次輸波大家都真係頹左。
冇錯，港大實力比我地強，但係我地有個痴線佬阿熙響度，所以並唔係冇得踢的。
如果我唔係發吽哣的話。
如果我唔係食左張紅牌的話。
*
隊友們大部分都搭旅遊巴返嶺大，少數既隊友直接由球場離開。
我沖完涼果陣已經換好衫，著埋件嶺大運動校隊風褸，所以而家直接走上看台接Jenny走。
我今日想做一樣野…
一樣我覺得係好重要既野…
要搵返一種好重要既感覺…
「以後要對你女朋友好啲呀。」
阿冰，我知架啦。
「老婆，我地都走咯。」我打起精神向Jenny一笑。
「嗯。」Jenny企起身。
佢一企起身，我先發覺到佢條短裙真係…好短…
件衫既領好低…
好易走光架…
同埋啱啱唔敢正面去望Jenny，而家先發覺佢真係好認真咁化過妝黎…
唔係唔好睇，但讀書人文青look啱佢多啲…
而家著到咁，反而有啲格格不入既感覺…
加上佢今日既表現，好有違和感…
明明前幾日我失左踪咁耐，問都唔問清楚，唔通我鳩噏果個藉口真係咁易令佢信服？
佢真係問都唔問喎！
我上下打量左佢一次，勉強擠起笑容，笑問：「今日著到咁既？又化妝化得咁靚既？」
Jenny好熱情咁橋住我，嗲我：「係呀，靚唔靚呀？好唔好睇？鍾唔鍾意我咁著？」
其實我想答我鍾意你以前咁著多啲，不過Jenny似乎係特登咁樣著比我睇，如果我答佢唔鍾意佢咁著一定好hurt佢。
我背住佢做既野仲hurt得佢唔夠多？
我扮到好滿意咁既樣，點點頭：「好靚女呀！我老婆真係正到不得了~」
但係「我鍾意你咁著」真係講唔出口…
而家係好有青春氣息，但我都係鍾意Jenny著返斯斯文文咁。
雖然點著都好，我鍾意既係Jenny個人。
鍾意Jenny個人？咁梁建威你條仆街又同阿冰上床？
「嗯，最緊要你鍾意~~」Jenny笑到好甜咁橋住我。
「唉，今日比你見到我咁柒添。」我扯開話題，唔想再提佢衣著。
Jenny搖一搖頭：「你都唔想既。」之後又對住我笑：「不過就算你幾柒我都係咁鍾意你。」
「哼，衰妹，你話我柒！」我搣一搣Jenny塊面。
「嘻，你自己講先架！」Jenny嘗試避開但唔成功。
總算…好似搵返小小果種拍拖甜蜜既感覺…
*
我同Jenny響銅鑼灣行左一陣街，之後就起程去○東酒店食自助餐。
中四平安夜去果間。
之後其實間中都有同Jenny黎撐枱腳。
可以話係充滿住同Jenny甜蜜既回憶。
我話過想做一樣野。
我自從中四平安夜果晚開始，就認定自己會娶Jenny做老婆，而果晚既開始，就正正係由呢度出發。
我希望今日再做一次果日做既野。
做愛就未必得啦，因為大家既屋企人都響屋企。
不過做唔做到愛都係其次，我想做多一次當日既行程黎加強我娶Jenny做老婆既決心。
希望可以打低罪惡感、揮去心中既不安。
我拖住Jenny去到餐廳門口。
「唔該，訂左兩位，姓梁既，電話係99912345…」我向住酒店餐廳Counter既職員講。
「梁生…搵到，請跟我同事行。」職員機械式咁回應。
我拖住Jenny跟住侍應帶位。
Jenny今次只係拖實我，冇再提出去海○粥店呢啲奇怪既建議。
一坐低，Jenny就好似當年咁橋住我出去拎野食。
進展都好順利…
…
真係好順利？
我想主動搵話題同Jenny講…但我發覺我做唔到…
我好似驚一開口就講錯野咁…
調返轉，Jenny就響度係咁搵話題同我講…
咁樣反而比我感覺佢好似想拼命掩飾一啲野…
感覺係…掩飾佢既不安？
佢今日好唔妥…
真係好唔妥…
唔可以令個氣氛咁尷尬…
我要做小小野先得。
（待續）