四十一
雖然好可惜，但係我都係決定唔去飲野。
因為我有啲野決定左要做。
系既現莊都有安排到巴士比返嶺大既同學，而我地一班返hall既同學就行緊去上車。
我路經大門口果陣見到都有唔少人準備落吧飲野，當中好多都係freshmen，但都有唔少老鬼。
我好似見到Alan同Cathy都響入面，如果係咁既話我地組都有差唔多一半人去捧場，都幾比面。
我同阿冰並肩咁行緊去巴士度，就響差唔多去到排隊既時候，我把心一橫，好似果日玩hall既鬼屋果陣咁，拖起阿冰隻手，拉佢一齊離開排隊既人羣。
阿冰有啲愕然咁望住我，問：「你帶我去邊？」
我微微一笑，回答：「當係我要你陪我去行下、散下心啦。」
其實係我想陪你散心。
我拖住阿冰行到去尖沙咀海傍，一路上大家都默不作聲，但係雙方似乎都冇鬆開手既打算。
我知道自己做緊咩的，我只係想安慰下自己既朋友。
…
應該係，除非唔係。
「呼，吹下海風真係爽！」我顧作輕鬆咁講。
同今日下晝唔同，一路上阿冰都默不作聲。因為佢討厭我粒聲唔出拖走佢？
唔係，我覺得唔係咁。
而係因為阿冰都察覺到我係清楚知道佢今日對住所有人都係強顏歡笑，所以佢都唔想再扮落去。
帶住面具做人，其實真係好辛苦。
我地沿住海傍默默咁拖住手行。
我拖住阿冰唔係為左想抽佢水，而係想透過我隻手將暖意傳遞比佢。
我唔打算問起阿冰既心事，所以呢個方法算係支持佢最直接既方法吧？
至於阿冰既心事…佢想話比我知、想向我傾訴既時候自然會講。
我就咁樣陪住佢先喇。
最後，係阿冰開口先。
「Jason可能有第二個。」阿冰既語氣好平淡。係扮出黎？
但係聽到呢個答案，我唔知點解冇乜驚訝既感覺。
話我馬後炮都係咁講，我覺得player有樣睇，而上次我既感覺係呢個Jason已經似個player。
仲要讀law，呢個世界不知幾多風流律師。
但唔能夠排除阿冰有搞錯既可能性。
「點解咁講既？你見到？」我問：「可能你有誤會呢？」
如果我冇Jenny既話，聽到阿冰有機會甩拖，可能會好賤咁覺得開心，然後可能再去追阿冰，或者至少陪響佢身邊。
不過，實際既情況唔係咁。
而家我想用朋友既身份，睇下有咩幫到阿冰，令到佢開心。
做唔成情侶，但如果阿冰開心既，雖然我係會有啲唔甘心，但至少會安心。
真心話呢？
樓主屌你玩夠真心話未？
屌，唔撚知呀。知都唔講你知。
又離題。
「誤會？」阿冰搖一搖頭，有啲落寞咁講：「我都唔知。係我一個響港大讀書既姐妹話我聽，佢見到Jason拖住第二個女仔，仲要唔止一次，唔止一個。」
「哦？」
「其實…我一早知佢係個點既人…」阿冰個樣雖然唔開心，但把聲依然鎮定：「好耐之前我發現過一次，佢話會改。我信左，以為之後會一直相安無事，以為佢真係會為我而改，點知今時今日先知，原來佢根本由頭到尾都冇變過。」
我未見過咁唔開心既阿冰，於是安慰佢：「其實都未確定，可能只係誤會呢！」
「嗯…可能啦。」阿冰仲係沒精打采咁。
我想做啲野令佢開心返。
「不如…」我腦海中閃過一個念頭，一個玩火既念頭，再講：「今晚你當住我係你男朋友先，我同你一齊響度散下心？」
我都唔知點解會咁樣衝口而出。
阿冰換左做一副好愕然既表情望住我。
屌，我究竟講左啲乜？
分分鐘呢句野會破壞晒至今我同佢既關係。
唔得，要補救先。
扮講笑先~
我甩開拖住阿冰果隻手，指住佢扮笑道：「講笑咋~有冇開心返啲呀！呢招係咪work呢？」
戇鳩，越講越柒。
阿冰繼續同我並肩咁行，但冇出聲。
我唔敢再望阿冰，好尷尬。
突然，我感覺到手上傳來一陣溫暖，我望一望，原來係阿冰主動拖住我。
WTF?
我個心又狂跳，成身好似僵硬晒。
「就比你做我一晚男朋友啦。」阿冰細細聲咁講。
我有冇聽錯？
「嗯。」我已經唔知自己做緊乜。
然後阿冰轉為橋住我，將頭挨落我手臂度：「比我挨下。」
「嗯。」
明明做阿冰一晚男朋友係我提出黎既建議，但我發覺而家緊張到唔知自己做緊乜。
唯有硬直咁借個手臂比阿冰做避風塘。
至少希望佢今晚唔駛亂諗野。
我呢？
個心好甜，又好緊張，但中間其實藏有一絲罪惡感。
我知點解的。
我個心應該係屬於陳仲妮的。
唔應該有梁冰冰既位置。
小小都唔應該。
但我控制唔到。
佢響我個心既位置越黎越大。
我地兩個一路無言咁慢慢行。
「你既手臂…好大隻好溫暖…」阿冰打破沉默，抬一抬頭含笑咁望住我：「仲好有安全感。」
安全感？
好諷刺，將手臂比女朋友以外既女人挨叫有安全感？
罪惡感又來了。
不過，我仲係希望阿冰開心，於是我講：「今晚，你想挨幾耐就幾耐。」
「嗯。」
另一段既沉默。
直至到我電話響起為止。
（待續）