三十九
「哈哈哈…」阿冰係咁笑，笑到就黎標眼水。
而家我地已經玩完左鬼屋，去左學校附近既一間茶餐廳食晚餐。
「喂，好啦喎，你笑夠未呀…」我已經一副囧樣。
「對唔住…」阿冰嘗試忍笑，但過左一陣都係頂唔順：「哈哈哈哈…」
哼！
雖然我諗如果係旁觀者見到當時既情況都真係會覺得幾好笑既…
阿冰笑多左一陣，終於慢慢止住左笑聲…
「你班朋友咁痴線既…」阿冰好似又開始想笑…
「痴孖筋架班撚樣，扮扮下鬼都走過黎con鳩我！」我響阿冰面前連粗都爆埋。
「好啦好啦，乖，姐姐錫返。」阿冰起一起身用手拍下我個頭。
「算啦，住左hall預左總有一日會比人咁玩既…」我無奈地道。
「唔係吖，見你都好融入佢地個圈子。我呢，就冇你識得咁多人喇。」
「弊左我識左班痴線佬呢…」我苦笑左一下：「係呢，覺得hall既鬼屋好唔好玩呀？」我轉一轉話題。
「好玩呀好玩呀！」阿冰突然兩隻眼發晒光：「估唔到hall啲鬼屋都可以做到咁恐怖。」
呢樣倒是真的。
呢啲學生活動只係低成本，加埋所有工作人員都係義務性質，但出黎既效果真係絲毫唔比海○公園全城哈囉喂差，呢點真係令人喜出望外。
「係呀，估唔到咁驚嚇！仲勁過海○公園！你冇同Jason去玩都唔算走寶喇~」Shit...口快快爆埋Jason出黎。
果然，阿冰聽到Jason之後停左一下。
真係只係好短既一下，但呢下係避唔過本座既法眼既。
「係呀，呢度真係好好玩！冇玩呢度先至係真正既走寶！」阿冰笑住咁講。
我今次睇唔出佢係咪強顏歡笑。
「鬼屋都玩左，所以唔好再唔開心啦～知唔知？」不過我決定照直講出心底既諗法。
「哼！我邊有唔開心過！」阿冰彈左我額頭一下。
你呃我唔到既。
就算你平時成日都掛住笑容都好，我都知你其實因為Jason既事而唔開心。
就算你唔講出口都好，我係知道既。
因為…
我一直一直都留意住你…
一直都…
…
醒呀梁建威，你隻腳跨過緊果條朋友線呀！
「哈哈~係既係既~」我要將氣氛帶返去愉快既氣氛先：「快啲食野啦，你掛住講~」
「哼，你夠係咯！」阿冰扮嬲咁指一指我。
*
食完飯之後，我地再行多陣，又傾下計咁，行到差唔多成十一點，等個鬼屋活動差唔多完，我先送阿冰去到佢棟hall樓下。
我送到佢去大門口。
「喂！Camp草！」阿冰突然叫一叫我。
「係既係既，請問有乜野事呢？Camp花小姐。」我又玩埋一份。
阿冰嫣然一笑，對我講：「多謝你今晚陪左我成晚，而家心情好返好多啦！」
嗱，我都話你有唔開心架啦！
「你唔係話你冇唔開心咩？」我挑下佢機先~
「呵呵，心情好返唔代表之前唔開心架喎~」阿冰笑住咁答。
又好似有啲道理…
「我返上去先啦！」阿冰向我道別。
「拜拜。」
阿冰行左幾步之後擰返轉頭。
「多謝你幫我達成夢想呀。」阿冰回眸一笑。
夢想？
莫非係指…
「匿響你後面就好似比男朋友保護緊我咁…」唔知係咪我錯覺，我覺得阿冰講呢句野果陣塊面好似有小小紅。
女神都會面紅既咩？我以為得Jenny先會。
Jenny…
「不過可惜你唔係真係我男朋友…」阿冰再講，語氣有啲落寞…
Shit，我應該點應機好呢？
「哈哈，你又想整估我睇我反應呢～」我又作五體投地狀：「你再一次收服左我喇娘娘~」
阿冰噗哧一笑：「係啦係啦！你都快啲返去早小小休息啦。」
睇黎我成功化解左尷尬既氣氛…
定我自己破壞左個氣氛呢？
不過，其實我都有句野想同阿冰講…
「我都好多謝你比左個機會我實現同女朋友一齊玩鬼屋既夢想。」
雖然阿冰唔係我女朋友。
Jenny先係。
*
我返到hall沖完涼，同Jenny傾左陣電話，之後準備訓覺。
阿熙都已經返左黎。
我地兩個響自己張床各有各hea既時候，突然聽到一大班人既腳步聲由遠而近，再停響門口。
Shit，心中有不祥既預感。
砰！
門粗暴地被打開了。
只見以司徒為首既獨男鬼屋團團員企左響門口對住我陰陰咀笑。
唉，都估到架喇，要黎既始終會黎。
「梁建威，仲以為你有咩事唔同我地玩，原來係拖住條女返黎曬馬！」司徒指住我怒吼（當然所謂怒吼其實都係開玩笑既意味重）。
我都費事解釋咁多，舉起雙手投降：「大佬，一陣錫住細佬黎con…」
至於阿熙就一臉疑惑咁望住我。
司徒就好滿意咁點點頭，而佢後面既獨男團就響度吶喊助威。
「咁你有冇乜野遺言？」司徒問。
「唔…」我好大聲咁講：「不如我同司徒黎個嶺南足球隊X con好唔好？」
X con，即係用司徒既細佬黎con我細佬…即係大家互撞細佬…
簡單啲講，平時係con牆角，而家係con另一個人既細佬…
獨男團先係愕左一下，之後大叫：「X CON! X CON! X CON!」
司徒目定口呆咁指住我：「你個仆街…」話口未完佢已經比幾條友夾起啲手手腳腳…
哈，我死都要拖埋你落水!
「原來你真係死基佬…」我好似聽到阿熙喃喃自語…
然後我既手腳都比人捉起…
Shit，我同司徒x con了。
呢一晚，就響瘋狂既hall life之下完結。
畢左業多年後，仍然懷念緊當年住hall瘋狂既生活…
（待續）