三十八
「喂～去邊呀？」阿冰比我拖住，不由自主咁跟住我走，但並冇抗拒。
「去比鬼嚇呀。」我拖住佢去附近最近一棟hall既鬼屋：「橫掂你咁想比鬼嚇，哈哈。」
「吓…但係我地飯都未食喎…」阿冰get到我地係要去玩hall既鬼屋了。
Jason比唔到你既野，就等我比你。
「唔駛食啦，一陣比鬼嚇飽你！」不過講真，我唔預期hall莊扮既鬼同鬼屋會有幾恐怖，但我想玩。
想同阿冰一齊玩。
彌補上次Re U冇得同阿冰一齊比鬼嚇既遺憾。
同埋彌補Jason唔陪阿冰去海○公園玩鬼屋阿冰既遺憾。
既然去唔到海○公園全城哈囉喂，去我地學校宿舍既哈囉喂都係一個唔錯既代替品。
阿冰聽到之後噗哧一笑，道：「痴線！嚇得飽既咩？」
「一陣你咪知囉！飽到嘔添呀。」我微微一笑：「快啲行啦，越夜越多人呀。」
「好喇。」阿冰笑了。笑得好甜。
「玩完先同你食飯啦。」我仲係拖緊阿冰隻手，雙方好似都冇意識要放開咁。
「嗯。」阿冰個樣好滿足咁點一點頭。
呵呵。
呢個時候電話突然響起。
係司徒。
「喂。」我接聽電話。
「喂，你響邊呀，成村人等緊你呀！」司徒怒吼。
仆街，唔記得約左成班層友去食飯再直落玩鬼屋添。
「呀，我突然有啲野做…黎唔到呀，你地玩得開心啲啦！」霎時間我都搵唔到咩藉口添，唯有求其亂噏。
「屌你吖，唔黎一早出聲吖嘛，我地等左你條冚家剷幾耐呀？」司徒好似真係嬲嬲地。
「係既係既，對唔住呀大佬。」今次係我錯，唯有死死氣咁道歉。
「算啦，我地而家去食野先，今晚返hall見啦。到時再Con鳩你條仆街。」司徒語氣總算稍為平復左小小。
「Sorry呀大佬。」我再道歉。
跟住司徒就收線了。
「女朋友？」阿冰個表情有啲…微妙，之後輕輕咁鬆開我隻手。
「哦？」我而家先發現我其實一路拖實阿冰呢件事其實唔係幾好。
「你女朋友咁惡既，隔住個電話都聽到佢鬧你。」阿冰少見地皺起眉頭對我講。
「呀，唔係唔係，你誤會左。啱啱果個係我同層黎架，佢等緊我返去食飯咋嘛。」我只係講左一半真話，費事大煞風景。
「唔怪得你大佬前大佬後咁叫啦，我仲以為你平時係咁叫你女朋友添，哈哈。」阿冰又展現出笑容。
女神笑起黎真係特別靚。
我收拾起心情，說道：「行啦，去玩鬼屋啦。」之後向住某棟hall行過去。阿冰尾隨其後。
今次冇主動再拖阿冰隻手。
唔可以再亂黎。
理智返晒黎了，我係唔可以跨過朋友呢條界線的。
*
我唔想主動拖阿冰隻手啫，不過世事往往唔係咁易控制。
每個hall既鬼屋都比我想像中更加恐怖、更加驚嚇。明明知道啲鬼係我地既同學假扮，明明知道鬼屋係宿舍報置而成，但係無論係陰深程度或者驚嚇程度都意外地高，真係嚇到我pk。
爭啲瀨尿。
阿冰更加唔駛諗，嚇到全程都拖實我、橋實我。
我個心跳得好快好快。
究竟係因為比鬼嚇到心跳加速？定係因為阿冰全程都拖實同橋實我所以心跳加速呢？
啲鬼可能見到靚女既關係，好似更加落力咁樣嚇阿冰，務求要睇到女神受驚既一面。
而結果就係阿冰拖得我同橋得我越黎越實，有時我甚至感受到佢既胸部壓落黎我手臂度。
Shit，扯扯地。
而且阿冰仲要驚到出左鬼屋之後都繼續拖實我、橋實我。
心跳加速既感覺已經舒緩左，取而代之既係我個心好甜好甜。
呢啲感覺呃唔到人，我真係鍾意左阿冰。
唔知阿冰諗緊乜野呢？
阿冰又拖又橋住我咁行其實惹黎唔少同學羨慕既目光。
定妒忌呢？
其實係咪一件好事呢？我覺得我話果條不能跨越既界線好似慢慢溶緊…越黎越模糊…
唔理了，我想享受當下呢一刻。
*
由於我地連晚飯都未食就出發，都算好早就去玩，所以好快已經玩左幾棟hall既鬼屋。
一路玩唔同hall既鬼屋，一路都幾順利，直至去到玩我自己個hall既鬼屋既時候…
開始玩既時候都順利既，但係我響住緊呢棟hall都叫做識下人，而其中唔少都有幫手做student helpers又或者響鬼屋入面扮鬼扮馬。
咁我一路玩既時候當然係照舊拖住阿冰玩，點知…
「喂，阿威拖住條女黎玩鬼屋呀！」其中一隻鬼突然指出我大嗌。
「仆你個街，拖住條女黎曬命，con鳩佢！」另一隻鬼大叫。
Con鳩我即係happy corner我既意思…
咦？我突然間覺得生命受到威脅…
啲鬼越黎越多…
「Con鳩佢！Con鳩佢！」
「Con佢老味！」究竟係Con我定Con我老味…
「唔好比佢走甩！捉住阿威！」
群情洶湧…
就響我仲思考緊果陣…
我發覺我啲手手腳腳已經比人捉住左…然後響黑暗中我好似比人運左去牆角度…
Shit…停手呀…女神望住架…
「Happy Corner to you! Happy Corner to you! Happy Corner to 阿威! Happy Corner to you!」由生日歌改篇而成既開心角落之歌響起…
嗚，喪鐘已經為我響起…
細佬瘋狂受到撞擊…
「好野！」
「禮成！」
「阿威好野！」
「繼續做野先！」
班仆街就咁將我掟落地下就算…
嗚…阿冰…救命呀…
（待續）