三十五

 

我地一行人入左海○公園入面之後，發覺今日雖然係星期五夜晚，但係都好多人。

 

唉，我諗一陣間無論玩鬼屋又好，或者玩其他機動遊戲都好，甚至乎睇表演都好，都一定好多人排隊。

 

即係今日入黎係玩排隊。

 

算，其實任何時候去得主題公園都預左多人，你估真係自己包左場咩？

 

我地算好彩，今日公園入面唔係好多自由淫。

 

大家入到園區入面之後其實都幾興奮，不過其中一個好似特別開心，周圍望，對身邊所有野都好似好有新鮮感咁，真係成個小朋友咁。

 

果個就係連個樣都好似小朋友既阿熙。

 

佢其實有小小刻意去掩飾自己既興奮，不過佢係咁周圍望，身為佢同房兼好兄弟既我好難察覺唔到。

 

其他組mates或者Cathy就唔知佢地察唔察覺得到了。

 

「喂，乜你冇黎過海○公園咩？入左黎之後好似好開心咁既？」我問阿熙。

 

呢個係我推理之下得出黎既結論。

 

「屌你啦，我邊有好興奮好開心？」阿熙回答。

 

小朋友你仲扮野？

 

阿熙諗左一諗之後繼續回答：「不過你條撚樣都估得冇錯，我真係第一次黎海○公園，所以先周圍望下，感受下呢度既氣氛。」

 

乜真係第一次？以香港人黎講真係罕見…

 

我於是拍一拍阿熙膊頭：「哈哈，一陣一齊去玩下鬼屋呀，機動遊戲咁啦。成班人一齊玩好好玩好開心架。」

 

阿熙答：「屌。」不過佢既表情似乎真係幾開心。

 

我發現，阿熙個人表現出黎好cool，有時甚至乎有啲孤獨咁，但叫親阿熙去啲團體活動佢都會玩得好開心。

 

其實，佢以前係咪冇乜朋友？

 

定純粹係鍾意團體活動？

 

*

 

園區入面每個鬼屋都人山人海，入場之前都要排好耐隊。

 

但係雖然要大排長龍，但係一大班人玩呢啲鬼屋其實幾好玩。

 

過程中發現到大波妹Amanda同肥仔賢行得幾埋，甚至乎入到鬼屋比鬼嚇既時候，Amanda都係橋實肥仔賢手臂。

 

就好似平時我同Jenny出街，有陣時除左拖手之外，Jenny都會咁樣橋實我行。

 

加埋平時響campus見佢地好多時都出雙入對，我懷疑緊佢地係咪拍拖。

 

就算你話係莊員，佢地都親密到有啲過份。

 

肥仔賢既性格同佢既肥宅毒外表完全唔同，似乎真係有啲料，呢一刻我甚至開始懷佢響o camp果陣講既感情宣言（即係拍過五、六次拖果次宣言）會唔會其實係堅。

 

我一直以為佢係吹水咋。

 

但又咁講，佢同Amanda一齊搞上莊，而莊務又繁忙，大家日對夜對，日久生情都好正常，更何況肥仔賢本身口才幾好。

 

係估唔到Amanda對外型咁冇要求啫。

 

呃，其實到呢一刻我都冇證據話肥仔賢同Amanda拍緊拖。

 

另外，唔知係咪因為我之前提醒過阿熙，話Cathy好似對佢有興趣，佢今晚全晚多數都響我隔離或者附近。

 

連入到去鬼屋比鬼嚇果陣佢都係響我隔離。

 

屌，而家邊個似基佬？

 

哎呀，Cathy媽，對唔住啦，可能唔小心影響你既大計添。

 

但係，其實由上次Re U開始，即使係約人果陣Cathy好似對阿熙有啲在意，但到大家一齊出到黎果陣又唔係好覺Cathy有主動出擊…（唔計上次Cathy請阿熙食tea喇…）

 

其實會唔會係我諗多左？

 

而且阿熙又話平時其實佢地都冇乜聯絡…

 

Well…其實關我咩事？我只係一條花生友…

 

至於Yuki反而更加主動想埋阿熙身，不過阿熙一於少理，好似基佬咁跟到我實一實。

 

靚仔係會引埋啲狂蜂浪蝶架喇。

 

不論好醜。

 

阿龍同Alan一貫作風，冇乜存在感。

 

不過Alan都有幫下我地（不分男女）排隊買下野食咁，係個低調暖男。佢冇乜提佢感情事，唔知其實佢有冇拍拖呢？

 

玩下玩下，都玩得晒所有鬼屋。

 

而成晚比鬼嚇下嚇下，不知不覺又到左走人既時候。

 

我地行緊去出口既時候，大家都仲係好熱鬧咁討論返啱啱玩鬼屋時既情景。

 

「屌，一啲都唔恐怖既，好撚假呀啲鬼屌佢老味。」阿熙連珠爆發，完全冇理過有女仔在場。

 

會唔會嚇走Cathy架？

 

不過…我懷疑佢其實係比啲鬼嚇到語無倫次…

 

「你講到乜都唔驚咁，點解你啱啱玩鬼屋既時候要好似基佬咁捉實我膊頭呀？」啱啱阿熙明明就係好驚! 嚇到好似個小朋友咁匿響我後面，哈哈。

 

所以Yuki咪埋唔到佢身囉~

 

「你老味你就基佬!」

 

「好啦好啦～入黎就係特登比鬼嚇架喇係咪？」Cathy好似個大姐姐咁為我地做和事佬：「大家熱熱鬧鬧咁玩咪幾好~」

 

哈哈，其實我同阿熙既相處方式就係咁架啦。

 

睇得出阿熙真係好開心。

 

我覺得佢以前響中學係未試過，又或者係好少咁樣同一大班朋友出街玩。

 

哈，咁冇枉費我先後兩次半逼半就咁叫佢出黎re u啦。

 

至於我開唔開心？

 

係囉，我今日究竟開唔開心呢？

 

我…唔係覺得唔開心，但總係覺得身邊欠缺左啲野咁。

 

一路玩既時候，個心一路會諗緊其他人。

 

唉，應該咁講…

 

我希望入到鬼屋入面比鬼嚇既時候，我希望捉實我膊頭橋住我隻手既，唔係阿熙，而係Jenny或者…

 

或者…

 

係阿冰。

 

一諗起阿冰，又諗起呢幾日內佢會同Jason入黎海○公園玩全城哈囉喂，我個心入面某處有小小隱隱作痛。

 

屌，唔好再亂諗野。

 

顧掂自己個Jenny先啦。雖然Jenny係唔會想黎貼錢比鬼嚇架喇，但我堅持既話我好肯定佢會陪我，不過費事啦。

 

正如我之前所講，我既夢想之一係同女朋友玩鬼屋。

 

呢個夢想，我諗除非我換左阿冰做女朋友，如果唔係冇可能實現架喇。

 

屌，我又亂諗啲乜。

 

梁建威，你記住呀，有果條不能跨越既界線架。

 

（待續）