四
阿冰突然比成班狗公圍住咁問佢拎佢男朋友既相, 搞到佢好鬼死尷尬。我就同阿熙好仆街咁響旁邊食下花生睇下戲。其實我響度諗，你班狗公見阿冰唔係好反抗就係得吋進尺圍住佢，其實你地知唔知咁樣會搞到個女仔好反感呢？
不過一定唔知啦，知仲會咁做咩。其實其他組女雖然冇阿冰咁靚，但有幾個都叫順眼吖, 反正阿冰都有男朋友, 不如show試下其他人仲好啦。好似大波妹Amanda，真係玩對波都玩成晚…
「好喇，大家放過阿冰啦～呀，係喎，阿熙你都未講你既感情狀況！不如分享下比大家聽?」組媽Cathy睇黎為左化解阿冰既尷尬，主動咁將個話題燒埋落阿熙度。
其實相比起獸父Simon, Cathy真係幾一個稱職啲既組媽，至少會同我地拎下野, 打下氣, 又會響玩遊戲時幫我地撥涼。唔似得獸父, 都唔多理我地呢班組仔。
哎，仲有奶爸Alan，不過佢先天上就有好多時間走左去做helper, 所以唔係成日可以現到身幫大家手。但至少佢在場既時候就算唔係幾識搞氣氛都好, 都會同大家不分男女咁傾下計。
屌，究竟揀人做組爸用乜野準則架?
「係喎係喎，阿熙你快啲講下你個女朋友!」阿冰見Cathy救佢仲唔即刻配合咩？
「吓？阿熙你已經有女朋友?」大肥婆Yuki好似對阿熙有啲興趣咁喎。
「真係架? 阿冰你又知既?」Amanda都好有興趣。
成班女突然高談闊論起黎，獸父都冇癮咁冇得追問落去。又估唔到班女好似對阿熙幾有興趣喎，雖然佢應該係我地呢組甚至乎成個camp最靚仔果個, 但佢個樣成個小朋友咁，而且又唔多出聲同人social。
阿熙個樣好似有小小無奈，答:「係呀，我有拍拖, 好出奇咩？」
「唔係下嘛, 你成個細路仔咁樣都有拖拍?」獸父Simon一副不屑既樣咁回應。唔知係咪因為個話題比Cathy引左去阿熙度搞到佢冇得繼續纏住阿冰, 佢個樣一面唔順超咁既樣。
其實我唔知其他組既組爸係咪都係咁重男輕女, 但係Simon比我既感覺都真係好差下。有乜理由將撩組女失敗既怨氣發洩落個組仔度，咁比說話個組仔聽?
阿熙塊面即刻黑晒。
「個樣細路仔唔會媾唔到女, 個樣好似你咁鹹濕成隻淫賤馬騮咁就真係有可能媾唔到女喇。」阿熙語帶嘲諷咁回應。
大家當堂大笑起黎。阿冰仲要笑得最大聲添。
獸父Simon紅都面晒，笑到我吖。
「係喇，阿熙個樣都幾陽光幾靚仔，有女朋友都好正常啫~」Amanda都幫住阿熙。獸父Simon塊面越黎越黑了。
「好喇好喇，其實都夜喇，聽日仲有大把活動要玩, 不如大家都係休息下先啦！」Cathy為左化解尷尬，提議大家休息下。
都好既, 其實我都已經好眼訓。就係咁，大家就求其有位就訓地下。我send埋個message比Jenny之後都訓了。
O camp既第一日就係咁過左去。
經過第一日既洗禮同埋夜晚房games仲有傾計之後, 大家似乎都熟左好多。獸父Simon同阿熙響訓醒覺之後表面上都好似冇野咁。
不過, 其實第一日獸父Simon都同我地呢班組仔唔多交流, 所以確實黎講真係睇唔出佢地有冇野。
我同阿冰經過尋晚響房出面傾計之後, 今日都多左唔少互動, 有傾有講咁，最重要既係我同佢傾計果陣可以名正言順咁佢，哈哈。
第二日既活動其實都係果啲遊戲, 好似soci game, 室內既活動Tasks, 水戰呀咁。當然唔少得夜晚既camp fire。
之前Cathy同我地講過, 個camp fire係玩真火, 搞到我都有小小期待, 諗住睇下個火有幾勁。可惜天公唔造美, 今日全日都落雨, 最後camp fire呢個環節要移師室內舉行。
本來有得用真火玩既camp fire, 最後變左響camp site個室內運動場入面用電筒代替。睇住班student helpers將一支又一支既電筒或者小型燈聚響運動場中間位置, 個感覺其實好怪。不過班搞手已經盡晒力, 天氣問題, 冇計喇。
其實圍住一堆燈同埋電筒跳camp fire又有另一番風味既...響MC既發號施令下, 我地都開始圍住個「火」開始跳舞。
話就話跳舞, 其實都係一啲好簡單既動作。成班人一齊咁做, 既青春又戇鳩。
跳跳下去changing partners既環節, 可以比我地呢狗公抽下啲女女水。不過大前提當然係你要拖中個靚女先喇...
話時話, 同左阿冰同組之後, 我好似淨係掛住佢，都冇睇其實個camp入面有冇其他靚女添...唔知一陣會唔會有機會拖一拖阿冰隻手呢？
唔知阿冰隻手拖落係點既呢？
響呢一刻我最期待既事情, 竟然係想拖下阿冰隻手!
一諗到呢度，我雙手大力拍一拍自己塊面, 同自己講:「屌你痴撚線咩，人仲唔夠仲想拖人隻手! 比Jenny知道會燒春袋架!」
響我諗下諗下既時候, 呢個環節都好快就開始左。一眾freshmen響MC既號令下, 跳下跳下, 又同隔離換下位咁...
而其實我唔駛好耐已經有機會拖玩阿冰隻手, 因為我地一開始既時候已經企得好近, 只要佢唔係轉去另一面既話, 我地好快就會拖到。
「喂！阿威!」阿冰一拖住我隻手就叫一叫我。
阿冰隻手...又真係幾滑...
「Hello! 阿冰!」我回答。
響我都未感受完阿冰隻手傳來既體溫同傾得兩句，佢就轉走左了。
嗯…個MC駛唔駛嗌得快到咁呀？趕住返房訓?
之後再轉下轉下其實我都冇乜心機留意轉到咩人lu~又唔係話個人唔開心, 不過就冇乜期待咁囉。
轉下轉下...camp fire都完埋了。
經過兩日既密集式遊戲，其實玩完camp fire之後大家都好攰。不過亦都因為密集式既遊戲，先令大家既關係更進一步。
一諗到聽日就係最後一日camp，其實都有啲唔捨得。我諗大家都有呢個感覺，所以大家沖完涼之後，又再次自動自覺咁一齊響房集合玩房game同傾下計。
其實雖然唔係同大家相處左好耐，但我都開始有啲唔捨得了。
就係咁，o camp黎到最後一日。朝早玩左一陣之後大家又集合響室內運動場度，mc講左啲感言之後，大家就四散咁去搵人影相。
我當然有揸住部iphone周圍同人影啦…有同組mates影，都有同啲啱啱識既同學影。
「喂，阿熙！」我叫住阿熙。「影幅相先啦衰鬼！」
結果搭住阿熙膊頭就咁影左張自拍。
「係呢，你Facebook account係咩？」我問阿熙。
「我冇。」阿熙搖搖頭。「我屋企冇電腦。」
咦？乜呢個年頭仲會有人屋企冇電腦架咩？
「唔駛驚訝喎，唔係個個都好似你咁有錢咁玩iphone。」阿熙應該係發現到我個樣。
我有小小老尷：「邊有呢。」
呢個時候有把聲響我地身後傳出黎：「嘩，乜原來你屋企連電腦都冇架？」
（待續）