二十七
開始溫書了。
張書枱唔大，我牛高馬大既身型坐響Jenny隔離，手臂不經意咁掂到Jenny既手臂。
掂一掂到之後，Jenny不經意咁望一望向我，我又望返佢，大家之後相視甜甜一笑。
嗯，雖然係溫緊書，但係都有淡淡既幸福感。
溫下溫下書既時候，未來外母都入過黎放低左啲橙比我地食。
表面上我係好比心機咁溫書，但實際我唔係好溫得入腦。
第一，就係我比完賽之後真係好攰，好想抖。
第二，嗯，就係我一路溫書既時候一路想拎個電話出黎睇下阿冰有冇搵過我。
佢臨走既時候話今晚會再搵我架嘛。
仲有，我又想知佢其實係咪真係返左屋企陪屋企人，佢係咪真係冇留響hall，另一方面又想八下佢男朋友有冇搵返佢。
咁樣算唔算叫做掛住佢？我唔知呀。
不過，而家Jenny真係坐正響我隔離，我都唔好意思響佢隔離搵第二個女仔，比佢誤會就唔係幾好啦。
始終我同阿冰根本冇做過乜野唔見得光既野，如果因為咁樣而比Jenny誤會好唔抵。
做左就話啫。
…
痴線。亂諗野。
又溫下溫下…
眼皮好似越黎越重咁…
又溫下溫下…
我索性扒左響張書枱上面休息…
矇矓間好似聽到Jenny同我講：「老公你攰就上我張床度攤一攤休息下啦。」
矇矇矓矓間…我好似又真係走左上Jenny張床…之後我又好似真係攤左響度…沉沉咁訓著左覺…
好攰…
*
我打開眼睛。
望張由窗外面透入黎既陽光，再望一望自己隻錶，原來已經朝早7點幾。
咦？即係我唔小心響Jenny屋企過左夜？
諗諗下，好似隱約記得我部iPhone響過，有人打過我手機搵我，然後Jenny由我個袋度拎左我部手機出黎代我聽，同對方講我今晚響佢屋企過夜。
隱約記得應該係我屋企人打黎，對話內容黎睇打黎既多數係細妹。
嘿，呢啲時候多數係我細妹知道或者估到我響邊。
我望一望身邊攬到我實一實咁訓既Jenny，心中一甜。不過佢個樣皺埋眉頭咁，又攬住我攬到好實，應該真係溫書溫得好辛苦，可能尋晚都溫到好夜。
真係我見猶憐呀。
我摸一摸佢把秀髮，一路諗其實我尋晚應該係要陪住佢溫書，點知個人太攰，諗住休息一陣但結果就一覺訓到大天光。
掉低女朋友自己訓覺，可恥呀。
不過更加可恥既係…陪緊Jenny溫書果陣我有諗起過阿冰。
唉。
係咪應該要同阿冰保持返小小距離？但係我又唔捨得。
起碼keep住做朋友吖。
一諗起阿冰，我又想拎部電話出黎睇下阿冰尋晚有冇搵過我。不過我驚一起身就整醒Jenny，所以都係冇起到身。
然後，不知不覺間我又沉沉睡去…
*
「起身喇，爛訓豬！」一把熟悉既聲音響我旁邊響起，係Jenny。
我睜開眼睛，發覺Jenny已經落左床，企左響床邊叫我起身。
我望一望個鐘，已經十點幾。
原來我唔經唔覺又訓多左三個幾鐘。
「起身啦～Daddy 媽咪買埋早餐比你呀～」Jenny搖一搖我隻手：「你唔係想佢地等下嘛？」
噢，買埋比我食？
無啦啦響自己個女張床訓左成晚，唔比說話我聽不突止，仲要買埋早餐比我食，未來外父外母對我真係好。
我捽一捽對眼，同返Jenny講：「未來外父外母對我咁好？我而家即刻起身~」
Jenny拍一拍我手臂：「衰人，邊個係你未來外父外母！我有話嫁比你咩？」
「你唔嫁比我嫁比邊個？」
Jenny突然定睛望實我，之後幽幽地道：「你話架…一定要娶我架…唔準反口…」
咁樣既語氣既？
仲係好似之前咁擔心緊大家讀唔同大學好易散？
你咁可愛，要擔心都係我擔心你比人搶走先喇~
「傻妹，唔娶你娶邊個？」我用堅定既語氣同佢講，之後伸出手指尾。
Jenny勉強咁笑返一笑，勾一勾我隻手指尾。
「一語為定架啦，到時唔準話唔嫁比我架！」我道。
「哼哼，衰人！出去食早餐先啦。」之後Jenny就轉身出左去。
我響Jenny出左房之後好快咁拎起部iPhone望一望，但個手機鎖機主頁唔見有notification彈出黎。
唔，可能阿冰尋晚真係冇搵過我。
算啦，我又唔係佢邊個，佢搵我或者唔搵我都係一件好正常既事。
我好快咁放低個電話出廳，因為大家已經等緊我開餐。
牙都未刷…
「我地買左大○活早餐，威仔你都快啲過黎趁熱食啦。」未來外母邀請我坐埋一齊食。
於是我就老實唔客氣咁同Jenny一家一齊食早餐了。
其實都唔係第一次，所以我都唔會唔自然。
「謝謝款待。」我雙手合十咁學拓也哥咁向未來外父外母道謝。
食完早餐之後時間尚早，我就繼續同Jenny溫書，然後溫到咁上下就同佢二人世界咁落去食午餐。
集中精神，專心溫書既Jenny真係好吸引呢~
我今個星期最後都係冇返到屋企。唔知細妹有冇比心機讀書呢？
食埋個靚午餐（其實都係Jenny屋企附近既茶餐廳）之後，我就送Jenny返屋企，然後我就啟程返嶺大了。
雖然尋日啱啱同一隊勁旅比完賽，但今日我地都要繼續練波，不過相信會係以輕鬆既操練為主吧。
（待續）