二十三

 

「喂唔好意思，遲左小小添！」阿冰響hall彈下彈下咁跳出黎。

 

我望一望隻錶，今次阿冰只遲左十五分鐘，比我預計既算快左。

 

「咦？今次竟然淨係遲左十五分鐘？」我一見到阿冰，即刻扮到好驚奇咁同佢講。

 

「喂呀！」阿冰一野拍落我手臂度，扮嬲咁話: 「都係等左一陣啫，駛唔駛咁寸我!」

 

「哈哈，好啦好啦，咁諗到去邊度食未？」我問阿冰。

 

「唔…不如去返上次屯市果間越南野？」阿冰提議。

 

係上次同阿冰睇電腦果陣請我食tea果間？都好，算遠離campus，應該唔會撞到阿熙又或者隊友們。

 

「唔，都好。」

 

「行啦。」

 

*

 

去到間越南野，可能係因為星期六既關係，都要等左一陣先有得入。不過可能兩個人易搵位啲啦，總括黎講都唔算等左好耐。

 

一入去餐廳度離遠已經見到有一大班人吵吵鬧鬧咁…咦，望真啲，全部著晒嶺大運動校隊既風褸…再望真啲，全部都識既？

 

唔係下嘛，就係為左唔想撞到班隊友所以先黎到屯市食，估唔到竟然響呢間越南野度撞到佢地。

 

「咦？果個咪阿威!」司徒第一個發現我。咁都唔駛大嗌出黎架…呢度公眾場合黎架…「真係有異性冇人性呀～」

 

之後班仆街響餐廳度起哄…咁樣我同阿冰會好尷尬架…

 

司徒仲要行埋過黎…

 

「威哥仔，話約左女朋友唔同我地食tea，原來真係…」司徒之後打量一下阿冰，然後伸隻手去握，一邊話：「你好呀阿嫂，我係阿威既隊友兼hall mate，叫我司徒得喇…」

 

我打斷司徒講野：「佢唔係我女朋友呀。」屌，比阿冰聽到實會以為我周圍唱佢係我女朋友…再講落去真係水洗都唔清，我要stop司徒亂講野。

 

阿冰古古惑惑咁望住我，之後握一握司徒隻手，微笑道：「你好，我叫阿冰。」

 

司徒握完隻手之後露出個好滿足個樣，之後對住我講：「嗱，你啱啱唔認阿嫂係你女朋友，佢即刻睥住你呀！」

 

喂屌，仲講。

 

阿冰又睥住我喇。

 

「都話唔係咯！」我feel到自己把聲有啲認真。

 

「明既明既，想玩地下情嘛~咁我走先啦。」走喇走喇，一早就唔好過黎吖嘛。

 

我轉頭望住阿冰，佢仲係用個古惑樣望住我。

 

我耍晒手擰晒頭咁同阿冰解釋：「是咁的，啱啱比完賽之後佢地提議食tea，咁我諗住快啲返去陪女朋友所以同佢地講我要返去搵女朋友推左佢地…跟住之後你後尾打黎…」我語無倫次咁同阿冰解釋。

 

阿冰終於忍唔住噗哧一笑，同我講：「你真好搞笑。同果陣響o camp第一次見你果陣一樣咁搞笑。」

 

我停止左手fing fing既動作，望住阿冰問：「你…唔嬲？」

 

「有乜好嬲啫。」阿冰面上笑意更濃，說道：「都唔關你事。」頓了一頓，又話：「我又冇話介意。」

 

唔介意…？

 

唔通…

 

唔會既，唔好亂諗野。

 

「係呢，你又會咁好黎睇我地比賽既？」我都係快手轉移下話題先，費事自己亂諗野。

 

「咁我今日星期六冇乜特別野做，Cathy媽媽又話想黎睇下你地比賽，咁咪同埋阿賢仲有Amanda一齊黎為你地打下氣囉～」阿冰答。

 

哎呀，如果你話你係特登黎睇我比賽，你話幾好呢。

 

算啦，咁大人個人咪成日掛住FF喇。

 

「我仲以為難得星期六，你會同你個未來律師男友出去happy happy添。乜佢上莊讀書果啲真係忙到完全陪你唔到咩？」趁機又問下阿冰同佢男朋友啲野先~

 

阿冰又嘆左一口氣，同平時精精靈靈既佢判若兩人，話：「唔知呢，我都想佢抽小小時間陪我。」

 

「佢唔得閒既，你咪去港大搵佢囉～比個驚喜佢，佢都應該開心既。」我記得阿冰講過佢男朋友響港大住hall:「有時唔一定要等男朋友主動既，身為女朋友響佢忙既時候比啲支持佢，都可以增進大家既感情。」

 

雖然唔係好想睇住阿冰同佢男朋友感情越黎越好，不過我又唔想見到阿冰冇厘神氣，再加上我講過我唔會越界打阿冰主意，所以做下佢愛情顧問都好。

 

鍾意一個人唔一定要得到佢，知佢過得開心就已經好好。

 

更何況…我響佢心目中可能只係一個好朋友。

 

真心話呢？

 

又黎？唔知呀屌。

 

「嗯…我都唔係未試過咁提議，不過佢話唔駛喎…」阿冰越講越唔開心咁:「我同佢…好似越黎越淡咁…佢對我好似越黎越冷淡…」

 

仆街，阿冰越講越唔開心，眼濕濕咁，個樣直情連眼淚都想流出黎咁款…

 

不過有個咁既女神級女朋友都可以對佢冷淡既，阿冰個男朋友究竟係一個點既人黎？

 

唔可以搞到阿冰喊既，要安慰返阿冰先得。

 

唉，雖然我係好想八下佢同佢男朋友點，但我諗我之後都唔好主動提起佢男朋友比較好…

 

「唔好亂諗野啦，佢都係讀書上莊忙先至唔得閒理你啫。咁佢讀書好大壓力架嘛，尤其是讀law添。」我安慰下佢，再扯開話題:「叫野食先啦，我都肚餓。」

 

「嗯。」

 

（待續）