十八
「我會每個星期六練完波就即刻返出黎見你架啦！本來我地閒日都未必有得見架啦，係咪？咁計落都係少左星期日，只係少左一日啫，係咪？」我要氹返Jenny開心先。
雖然我覺得我係響度狡辯多過氹…
「兩日變左一日，少左一半呀…」Jenny仲扁扁咀：「同埋，人地諗住你可以星期五落堂就返出黎，可以約出黎架嘛。」
星期五落堂仲出黎？你真係當我鐵人咩，係都返屋企休息下啦。不過呢句係唔講得出黎的。
「咁我就算唔駛練波都冇可能個個星期既星期五六日都出黎陪你架嘛。你可能到時讀書要溫書都忙呢！咁果陣就唔得閒見架喇。」我繼續諗下可以點開解佢。
「咁我地可以好似高考同會考果陣咁，一齊溫架嘛。」Jenny keep住個扁咀樣。
真係我見猶憐呀。
「咁呀…一係我應承你，星期日我都會起身過黎搵埋你食早餐，之後先返去學校練波，好唔好？」我繼續講：「如果你覺得都係唔夠既，一係你跟埋我一齊過屯門果面，等我練完波之後帶你周圍行下吖。」
唉，其實星期日朝早我想訓覺。最好訓到12點，食完午餐即刻走人返學校。
另外講起行屯門…其實住左hall之後我都冇認真行過屯門，我帶Jenny路既話分分鐘盪失路…
不過而家要氹返Jenny開心，唔理得咁多。
作為Jenny既男朋友，我想佢開開心心。
「咦~咁遠。」Jenny諗左一諗，之後抬起頭望一望我：「唔駛啦，我都唔想你咁攰。」
「嗯，咁我應承你，每個星期六返出黎之後都一定同你去拍拖拖~」我應承Jenny。
「嗯，好啦！勾手指尾!」Jenny終於有返小小笑意。
希望佢呢個笑意唔係夾硬逼出黎。
「嗯，一言為定!」我伸左隻尾指出黎，Jenny都伸左隻尾指出黎，大家勾左一勾。
*
我又送到Jenny去到佢屋企樓下。
每一次都會黎個goodbye kiss，今次當然唔例外。
錫完之後，Jenny抬起頭望實我。
「你會唔會有朝一日唔要我架？」Jenny望實我問。
頂你，又問。我真係令你咁唔放心咩？
「唔會呀唔會呀唔會呀～好重要所以要講三次!」我氹下Jenny。
唔好再問呢啲咁戇鳩既問題啦好冇。
女人係咪真係冇野好問？
「而家已經少見左，之後仲要更加少見，所以…其實我有啲驚…」Jenny又dup低頭講。
而家先啱啱開學咋喎，你咪有排驚？
呃，唔可以答得咁直接，等我修飾下先。
「傻妹，我地一齊左3年幾4年，乜你對我地既關係咁冇信心咩？我地係入左兩間唔同既大學，不過咁樣唔會阻到我地既感情架嘛。小別勝新婚，我地之後會更加珍惜對方架嘛，係咪？」我攬一攬Jenny，答左呢個經修餘既版本：「我地讀係讀3年大學咋嘛，好快3年又3年，之後3年又3年架啦～」
「嗯。」Jenny抬起頭望住我：「唔準趁我睇唔到去識第二個女仔!」
又係呢句，你悶唔悶呀？
但係…唔知點解，今次我好似有啲心虛，唔係好敢望住Jenny對眼…
係因為阿冰？
我好似連有呢個人既存在都冇同Jenny講過。
不過我已經下定左決心，就算我真係鍾意阿冰，我都絕對唔會做出啲對唔住Jenny既事…呱？
雖然佢問左咁多無創意既問題，我都唔係好想答，但佢都係擔心我地先問啫。
我要比啲安全感佢先得。
「梗係得啦，唔通你信我唔過？」一諗到呢度，我就好肯定咁答返Jenny。
「係啦。」Jenny聽到我斬釘截鐵既語氣，笑返：「我都冇話唔信你，傻瓜。」
「夜啦，返上去啦，聽朝過黎同你食早餐。」嗚呀，其實我唔想咁早起身。
「傻瓜，真係唔駛啦。」Jenny話：「我知你今日選拔好攰，之後又要黎陪我。我都想做一個體貼既女朋友，唔想你咁辛苦。」
抵錫~咁我就恭敬不如從命啦！
「咁我都走先啦，返去打比你啦。」
「嗯。」
*
轉眼就星期一。
「你又請我食飯，你咁多錢咩？」我同阿冰一邊行去canteen我一邊問阿冰。佢話要慶祝我入選到足球隊所以要請我食飯。
於是落左堂之後我就同佢去學校既canteen食個午餐。
「哼，咁你食唔食吖？」阿冰扮嬲咁問。
「梗係食啦，camp花請食花，幾多人恨都恨唔到~」我就梗係開心啦。
就算調返轉係我請阿冰食飯都開心架啦！
之後，我同阿冰成日都會兩個人出雙入對。
*
拜大家都有hall住所賜，我地要出黎話都冇咁易。
我響學校上堂或者落堂既時候，多數都係同阿冰或者阿熙一齊。不過阿熙落左堂之後好勤力咁去幫唔同既學生補習，佢話佢係一條窮撚，唔努力啲搵錢分分鐘連學費都交唔起。
有冇咁誇張呀，有大學生學費貸款架嘛。
至於我同阿冰除左食午飯或者tea之外，都會一齊去附近超市買下生活用品，之後每次都會送佢返hall。
唔好心邪呀，雖然阿冰同房成日都唔響度，但係我上左阿冰間房最多傾下計，冇做其他野架。
有陣時除左阿熙同阿冰之外，都會同hall啲朋友、同層，又或者肥仔賢佢地打發下時間。
至於夜晚就多數係同hall既朋友一齊食，但間中都會同阿冰去屯門市中心撐枱腳，過下二人世界。
返到hall就同Jenny傾半個鐘左右電話，每日如是。
至於阿熙？佢話放左學係補習賺錢既黃金時間，所以閒日甚至乎星期日練完波之後既夜晚，基本上都唔見影，好夜先返。
讀書黎講，其實我都好hea下，會走下堂（主要走lectures, tutorial要點名唔敢走）。相比起我親愛既女朋友，我所作所為簡直唔似一個讀書人。不過難得上到大學，hea下玩下先至不枉。
燃燒青春呀！
咦，定燃燒緊GPA呢？
而星期六日就拍拖練波。
就係咁，10月份來了。
（待續）