十五
「入黎啦。」阿冰開左門，之後一野攤左落其中一邊床。
間房屬於阿冰既果一邊好樸素，冇乜特別裝飾，書枱上面好整齊咁放左幾本書，張床同被就係純白色，亦都冇周圍亂咁掛衫，應該係整整齊齊咁收晒入衣櫃度。
另一面就仲樸素，連書都冇，只有床單同被。
「你同房呢？」我放低左啲「戰利品」之後忍唔住問。
「佢好似住附近，呢幾日都冇返黎訓。」阿冰響張床伸一伸懶腰。
咁正，咁同住單人房有乜分別？
咦？咪住先，而家即係孤男寡女共處一室，嘿嘿嘿…
…
講笑，我冇諗過做任何野。
幫阿冰拎埋啲野上黎，我都差唔多時候走。
「咁我都差唔多係時候走啦。」我同阿冰道別，都準備離開:「今日，多謝你餐飯啦～」
「唔多謝啦，話左請你食飯架嘛，況且比起你果次錫Simon都唔算得係啲乜啦！」阿冰笑住咁同我講，不過似乎冇打算留我。
哎呀，等我仲有一刻諗過孤男寡女共處一室，阿冰會諗住以身相許添。
…
講笑，我係正人君子，從來冇咁諗過。
再講，做一次搬運工人就以身相許既話，阿冰既下面都幾唔得閒。
…
屌，我諗緊乜野。我咁諗係響度侮辱緊女神呀！
「同埋我都多謝你陪我睇電腦，又會開解下我~」阿冰繼續講。
「邊係呢，我都冇乜點幫到手。」我突然諗起啲野，問：「係喎，之前又話駛我幫手拎行李既，今次又比我上黎？」
衝口而出問完之後有小小後悔，呢句問得好似有啲失禮。因為上次阿冰已經講左話唔想比人誤會我係佢男朋友。
「哦，之前唔想比人以為你係我既男朋友，不過而家諗落，比你做我男朋友應該都幾好吖！」阿冰若無其事咁答。
咦？咁都得？
我個樣應該係呆左一呆，阿冰見到之後指住我好古惑咁笑：「睇下你個衰樣，我講笑咋！你諗下好喇！」
我真係嚇左一嚇。講笑搵第二啲啦。
「咁多野拎咪麻煩你拎上黎囉～不過都真係唔該晒你！同埋諗真啲，男仔幫個女仔搬重野係紳士風度，咁易就比人當係男朋友咩！」
「你又話唔識收兵，我已經比你收服左喇娘娘。」我作狀五體投地。
「呵呵~」
「咁我走先啦。」我道別。
「嗯，拜拜~」阿冰對住我揮手：「得閒上黎坐啦。」
「就咁話啦。」我真係走了。
*
返去宿舍既路上，阿冰果句「比你做我男朋友應該都幾好吖！」一路響我腦海之中揮之不去。
聽到呢句野既時候，我除左話真係嚇一嚇之外，個心仲跳得好快。
真正既心跳加速。
以前既藉口唔好再理，我諗我都係時候真真正正咁面對下自己對阿冰究竟係乜野感情。
真係單純係朋友咁簡單？
或者進一步咁講，我真係純粹想同阿冰做朋友咁簡單？
我響o camp第一下見到佢既時候已經覺得佢好靚。我諗任何正常既男人或者男仔，見到佢都會覺得佢好靚。
其實，我係咪果一下已經對佢一見鍾情呢？
就憑個樣對人地一見鍾情，乜梁建威你咁膚淺既咩？
…
不過我鍾意Jenny既契機，最初都係因為覺得佢好可愛。
當然之後發掘左佢好多好多優點喇。
離題了。
講返阿冰。
我不斷咁用男人女係正常呢樣野做藉口去不停咁望阿冰，其實係咪由果陣時我已經鍾意左佢？
之後下意識咁幫佢擋左獸父Simon一吻，又係點解呢？
之後不斷同佢sms，大家又約過一齊出街，呢個過程直情好似追緊佢咁。
我有啲亂。
不過點都好，就算我唔係真係鍾意阿冰，但係至少我對佢有好感呢樣野應係真。
至於阿冰點諗，我真係唔知，但至少我睇得出佢應該好在乎佢男朋友。我諗對住我，應該只係當我朋友吧。
而我…都好清楚自己條界線響邊，我有我既Jenny，阿冰都有佢既男朋友，我地之間唔會再進一步。
或者再進多一步都好，都只會係好朋友。
我係唔會做任何野嘗試去跨越呢條界線。
絕對唔會。
*
當晚，我好似平時咁同Jenny傾左陣電話，不過依然冇提過關於阿冰既任何野。
同時，都有繼續keep住同阿冰sms。
但我提醒自己，有條明確既界線係絕對唔能夠跨越。
*
好快又到左開學之後既第一個星期六。
好多宿生響星期五上晒堂就一早返左屋企。
不過我同阿熙都留左響hall，仲一早起左身。
點解？因為今日係大學足球隊選拔既大日子。上唔上莊我未決定，但至少波就一定要踢既。不過，大學既足球水平應該高過中學好多，我唔係好大信心可以入選到。
「老公仔加油！你實得既！」呢句係尋晚同Jenny傾電話臨收線之前佢同我打器既說話。
要好好比心機先得。
不過比起自己，我覺得阿熙入選既機會應該仲細。佢細細粒既身型完全唔似踢波，加埋佢個小朋友樣，我覺得佢似係去上PE堂多啲。
我響間房入面望住阿熙咁樣諗，唔小心笑左出黎。
阿熙白左我一眼:「你又笑乜鳩？」
同佢個可愛既小朋友樣完全相反，阿熙極度爛口，句句都有性器官咁濟。
「冇呀，驚一陣間選拔果陣撞鳩死你。」我咁答。冇理由同佢講我諗緊你而家好似係去上PE堂個樣架。
阿熙定睛咁望住我，問:「知唔知我望住你諗起乜野?」
「唔知。」我又唔係你心入面條蟲，點知你諗緊乜~
「四肢發達，頭腦簡單。」阿熙一副冇你咁好氣既樣:「踢波唔係淨係睇身型既。」
「屌你啦。」踢波唔係睇身型，不過有身型一定著數小小既，我諗。
我地兩個一路互寸一路出發去球場。
（待續）