四

四

「你…係咪唔係人類？」呢個問句聽落好匪疑所思，但我呢一刻覺得眼前呢位三上○史真係唔似係人類！

三上○史搖一搖頭。

「莫非…」我低頭諗左陣，先問出一句連我都覺得不可思議既問題：「你…係妖精？」

「Bingo！」妖精先生雙手一拍：「似乎妳都已經知道發生乜野事嘞！」

完全係難以置信…日劇橋段竟然發生響我身上…

但我望一望周圍果班郁都唔郁既人，又明白到我而家真係遇上左呢啲不可思議既事情…

我對住妖精先生搖一搖頭，說道：「其實我仲未搞清楚發生緊乜野事…乜妖精先生你真係存在？我以為係日劇先有…你個樣仲要同三上○史一模一樣…」

妖精先生哈哈一笑：「你講緊求婚○作戰？我以前幫過個編劇追返佢太太返黎，所以佢話為左答謝我，先會用我黎做題材拍一套電視劇。」

「所以…套劇入面發生既事…其實係真既？」我依然難以置信…

「傻妹，梗係唔係真架喇！」妖精先生又拍一拍我個頭：「改左好多野架！」

我滿腹疑惑。

「妖精先生？」我試探性咁問一問：「介唔介意我再問你小小問題？」

「問啦！」妖精先生答得好爽快。

「你唔係住響教堂，淨係會響教堂出現既咩？」我問：「但呢度係一間中式婚宴餐廳黎喎…」我頓左一頓再講：「仲要係連鎖式…係地產霸權下既產物喎…」

妖精先生諗左一諗。

「唔…咁講啦，如果響教堂入面幫你地人類係正職，咁我出黎呢一類婚宴餐廳就係兼職！出黎搵外快！」妖精先生答：「不過住就梗係響教堂住啦！」

「正職？兼職？」究竟妖精所在既世界係點既呢…

「冇錯，妖精都要有收入既。幫助你地人類呢種行為就係我地既工作，我地叫呢樣野做殊樂畢比。」妖精先生道：「從中賺取既收入就叫庫·里波斯。庫·里波斯冇妖精會嫌多，所以我地間中會去啲搞結婚既地方行下，睇下有冇機會做多幾次殊樂畢比。」

「殊樂畢比？庫·里波斯？」我好似越黎越疑惑…

啪！妖精先生又拍一拍我個頭。

「呢啲妖精既術語你就唔好理咁多啦！」妖精先生說道。

都啱既…

「可唔可以有個請求？」我突然諗起小小野。

「妳想而家即刻返過去？」妖精先生問：「但妳要比小小時間我講解一下規則先。」

「唔係…」我搖一搖頭：「我記得套劇入面你係講日文，而家聽你講廣東話好唔慣，你可唔可以講返日文…」

啪！

妖精先生又一手拍落我頭頂，說道：「妳識聽日文咩？」

我俏面一紅，伸一伸舌頭：「唔識。」不過又補多句：「不過講日文好似有氣氛啲…」

啪！

喂，好喇喎，我個頭唔係比你打…係打都淨係比Camp草打…

「廢話少講！」妖精先生好似開始頂我唔順…「準備好返過去未？」

真係可以返過去？

但係…我開始猶豫…

我dup低頭，唔敢望向妖精先生…

無錯，我的確係覺得好後悔冇好好抓緊梁建威…但係，當日佢係有女朋友的…所以…當日我先至選擇退出…

因為…我好明白比第三者搶走男朋友既感受…

我就係唔想咁自私…影響到Camp草同埋佢女朋友Jenny…

況且…畢竟當時Camp草同Jenny已經一齊左成四年，佢地之間感情一定深厚過我同Camp草…

當晚同佢上左床發生完關係之後，見到佢同Jenny傾電話講大話掩飾時果個後悔、不安樣…我冇辦法忘記。

呢一世都唔會忘記。

或者就係睇到佢對Jenny既內疚同後悔，我先覺得佢一定係愛Jenny愛得好深，然後我先至下定決心退出呢場三角戀吧？

講到底，我只係個第三者…唔係，或者…只係佢生命中既過客…

如果我夾硬同左Camp草一齊，而之後佢先發覺自己鍾意既始終係Jenny，果陣啱啱先失戀既我仲接唔接受到呢個打擊？

既然係咁…咁不如由頭到尾都唔好開始…

所以，我放棄，之再嘗試放低佢…即使明知自己會後悔…

所以，而家妖精先生話比個機會我回到過去，我依然猶豫不決…

哈，我啱啱仲大言不慚咁話如果返到過去我一定唔會放手添…

沉默。

妖精先生望住我。

「妳唔想返去？」妖精先生問：「即使好似而家咁後悔都唔想返去？」

「我…唔知…」我依舊dup低頭，搖一搖頭：「我唔想做第三者…我好明白果種比人背叛既感覺…」

同埋…我知梁建威係唔會放棄Jenny…

「唉，你地啲人類…」妖精先生嘆左口氣：「愛情本身就係自私…」

妖精先生停左一停，又問：「妳睇我套劇既時候，想唔想巖瀨健同吉田禮最後響埋一齊？」

我點點頭。

「響妳眼中，健又算唔算係第三者？」妖精先生咄咄逼人：「唔好唔記得，係多田老師首先同禮拍拖。」

我…有小小混亂…

我冇諗過呢點…

健…響多田老師同禮既婚禮上面間接搶婚，究竟算唔算係第三者？

（待續）