二十九

二十九

我同梁建威拍住拖咁響屯市行街~

「呃…其實我係一個冇乜情趣既男人，提議黎屯市都係漫無目的咁行…妳會唔會介意？」佢一臉唔好意思咁講。

「唔會啦～」我同你一齊就得架啦…

結果…我地真係響屯市度漫無目的咁行…

行到夜晚食飯時間，我地又好自然咁行左去間越南野門口…

「你又話成日食越南野會厭~」我古古惑惑咁笑住問梁建威：「咁你又帶我黎？」

「唔知點解同妳響埋一齊硬係覺得一定要黎呢度食越南野。」Camp草R R頭咁回答。

「哦，你即係話我似越南人！」我扮嬲。

「係呀～北漏洞拉~~~木精失改夜漸沉越南~」Camp草扮左個理所當然既樣出黎~

「喂呀！」聽到佢扮晒野講越南話，我忍唔住笑左出黎~

點解你咁搞笑架~

之後…我地就各自嗌左野食…一路食一路傾計…

不過，我留意到Camp草食野既時候不斷咁覆緊短訊…

我知道係Jenny。

其實，我諗我應該要呷醋…

但唔知係咪因為內疚、因為罪惡感，所以我完全冇出聲阻止既打算…

更加連呷醋都冇…

小小都冇…

我已經搶左Jenny既男朋友架喇…唔通連短訊都唔比佢地Send咩…

或者…

咁樣諗我會好過啲…

「係呢，聽日你幾點比賽？」我問：「同埋我應該點過去球場？」

「妳想黎？」男朋友仔問…但佢個樣好似唔係幾願意咁…

「係呀。」我扁一扁咀：「但係你好似唔係幾想我黎咁喎…」

「唔…」佢冇否認。

…

咁係咪即係默認？

可能係見到我個扁咀樣，佢即刻澄清：「唔好誤會，我唔係唔想妳黎，只係…」

佢都諗左一諗，先至講：「記唔記得…我同妳講過…Jenny都會黎？」

我點一點頭。

「…我諗住…」男朋友仔既面上閃過一絲愧疚：「聽日會同佢講清楚…所以…我諗緊…如果妳都響度既話，可能會更加刺激到佢…所以，我諗妳聽日都係唔好黎比較好。」

我明白了。

聽日…梁建威就會Jenny講清楚…

…

…

…

我應該開心先係架？

但係…點解我好似…有啲內疚咁既？

唔知係咪因為提起左Jenny既關係，之後成餐飯既氣氛好似變得尷尷尬尬咁…大家都冇乜點出聲。

就算有講野，都係一句起，兩句止…

可能…大家心目中都係充斥住內疚感吧…

會唔會…之後大家心入面都會有條刺響度呢？

咁樣一齊既話又係唔係好事呢？

食完飯之後，我地就決定返hall。

一來因為個氣氛怪怪地，二來男朋友仔聽日要比賽，所以都打算早啲返去宿舍休息。

*

好快，我地已經返到hall樓下。

男朋友仔首先送到我去大門口。

「今晚真係唔上黎？」我問男朋友仔。

佢錫左我塊面一啖，之後答：「今晚唔喇…聽日要比賽，我驚上黎訓既話會消耗太多精~力。」

衰人梁建威特登將個精字拉長黎講。

「哼，你個腦淨係諗埋呢啲野！」我有小小嬲：「你上黎陪下我唔得既！」

「唔係唔係！」死人梁建威耍手擰頭：「我女朋友咁靚，我驚我把持唔住啫。」

哼。

「聽晚妳留響hall？」佢見我唔出聲，於是提議：「我聽日返到黎即刻過黎陪妳喇，好唔好？」

聽日…係我返去未來之前既最後一日…

過左十二點我就要返去架喇…

不過，可能響未來等待我既，係一個美好既明天呢～

諗到呢度，我明明應該開心同埋期待先啱…

但唔知點解，內心既罪惡感又湧出黎…

為左唔好再亂諗落去，我好快咁回答我親愛既男朋友仔：「我會留響hall呀。咁聽晚再見喇。」

彷彿要驅散我心入面既不安咁，我一轉身好快就走入大堂㩒。

最後，響入之前我都係回望左梁建威一眼…

佢企左響門口仲未走，見我擰轉身就撐起個笑容再向我揮揮手。

我向佢揮手既時候，仲一直留意緊佢既笑容…

點解…

我會覺得佢既笑容…

唔係由心而發既？

點解…

佢既笑容…

好似係扮出黎咁既？

我懷住不安，慢慢咁走出…

好不安…

梁建威叫我聽日唔好去睇佢比賽…

我係咪真係應該唔去？

（待續）