三十二

 

之後我地繼續一路食飯一路傾計。

 

「係呢，今日又會咁早返hall既？」我問阿冰。

 

意外地，呢句普通既問句打開左某道溝通之門，結果除左好似啱啱咁平時咁普通地傾計之外，我地傾傾下計仲越傾越深入。

 

阿冰同我講佢係家中獨女，而雙親就係做小生意既，業務通常都係以香港為主，多數會留響香港，但有時要去見客或者入貨等等都要周圍去（有時香港有時係大陸或者外國）。

 

好似今日咁，原本阿冰都諗住同屋企人食埋晚飯先返hall，但係突然有個客約左佢父母傾生意，所以阿冰先至冇得同佢地食晚餐，加上臨時臨急又搵唔到朋友一齊食，咁就決定早啲返hall睇下有冇飯腳一齊食夜晚。咁啱我又想搵人食飯，所以就決定同我一齊食嘞。

 

呢啲真係緣份呀。

 

「咁我咪要多謝世伯同伯母放你飛機，等我可以同到你食飯？」我打趣地說道。

 

「去死啦你！」阿冰企一企起身隔住張枱一野拍落我手臂度。

 

「嗚…陪你食飯仲要比你打…」我扮喊。

 

「係我陪你食飯先啱呀~」阿冰鼓一鼓起返面。

 

好可愛。

 

「係啦係啦～多謝camp花賞面~」我順下佢意。

 

「哼哼，咁就差唔多！」阿冰好滿意咁點點頭。

 

之後我地繼續傾計。

 

阿冰輕輕咁講起佢同佢男朋友既野。

 

佢男朋友叫Jason，係中六既時候響一個聯校既聖誕舞會入面識既。Jason係名校生，讀書好好，識左冇耐已經開始追求阿冰，之後阿冰又對Jason有feel，所以就響埋一齊。不過就算一齊左之後Jason都唔係成日得閒陪佢，而家入左港大讀law之後就更加少時間陪佢。

 

而且情況每況愈下。

 

唔怪得阿冰最近好似唔係幾開心咁喇。

 

最後阿冰終於都比左Jason幅相我睇。呢個Jason係一個靚仔黎，帶住副黑色粗框眼鏡，好有書卷味。

 

要對比既話，阿熙雖然都好靚仔，但佢果副長唔大個樣，令佢就算生都幾靚仔都好，都好似個小朋友咁。

 

女人就話童顏好啫，男人係要有幾分成熟既味道。

 

再過多幾年分分鐘阿熙就算係靚仔可能都淨係可以媾妹。

 

不如返去提議阿熙留鬚。

 

算，反正佢都有女朋友，Cathy又疑似鍾意佢。

 

至於佢兩個同我相比？

 

唔好玩啦，我諗我個樣最多叫順眼，同上面兩位相比爭十幾條街。

 

另外，純粹係男人既直覺，聽完阿冰講佢同Jason既故仔仲有睇埋Jason幅相之後，我覺得呢個Jason並唔係啲乜野好男人。

 

似係有書卷味既player。

 

冇根據的，純粹係感覺。

 

當然我唔打算同阿冰講呢番說話。

 

一來我唔識Jason，根本冇證據話佢係一個壞人。

 

唔通話呢度唔係法庭，我對眼就係證據咩。

 

二來係寧教人打仔，莫教人分妻。

 

何況我覺得我講完之後都唔會影響到阿冰對Jason既感情，反而會令阿冰覺得我響度搞破壞。

 

呢種可能性唔係冇的。

 

作為等價交換，我都講左我啲背景資料比佢聽。

 

阿冰對我既戀愛史似乎好有興趣，而我都好承實咁同佢講Jenny係我既初戀，一拍就差唔多拍左四年拖。

 

傾傾下計，傾到連間餐廳都差唔多收鋪。

 

埋完單我地就準備走人。

 

我地AA制，阿冰冇諗過要我請。

 

真係一個好女仔。

 

我望一望個電話，Jenny send左幾個messages比我。

 

啱啱同阿冰傾得太入神，唔記得check電話添。

 

係時候要盡返好男朋友既責任。

 

「我覆一覆個電話先。」講完呢句之後我行開左小小先打電話比Jenny，費事比阿冰聽到我地講電話，亦都費事比Jenny有機會聽到阿冰既聲音。

 

嘟…嘟…

 

「老公！」Jenny唔夠10秒即刻接左電話。

 

「老婆~我啱啱食完飯呀～你溫書溫成點呀？」關心下Jenny聽日mid term既溫習進度先~

 

「好多野溫呀…我驚溫唔切。」Jenny太謙虛喇。讀書狂人都溫唔切書，呢個世界上冇人溫得切。

 

「加油，攰就休息下喇。」我同Jenny講：「我返緊hall呀，返到去打比你啦。」

 

「哦…」Jenny又黎扁咀咁既聲。

 

「拜拜。」要cut線了。

 

「老公。」Jenny叫我。

 

「響度。」

 

「你…冇覆我messages既？都成幾個鐘了…」Jenny問。

 

呃，唔通話由響hall約完阿冰之後我興奮到冇睇過個電話咩。

 

btw，Jenny既語氣好似有小小怪咁既。

 

唔…

 

可能係因為見我太耐冇應機所以擔心我。

 

下次要做好小小先得。

 

令女朋友擔心人身安全既男人唔係好男人。

 

「冇呀，練完波同啲隊友一齊，hea左陣先去左食飯，大家一路傾下計又玩下咁，所以冇睇到電話咋嘛。而家一睇到啲messages即刻覆你啦～」腦筋急轉彎，我即刻講左個大話。

 

嗱，我唔係有心呃Jenny呀，我唔透露阿冰既存在係驚佢胡思亂想咋。

 

「咁呀…」Jenny欲言又止。

 

哎呀，不如返到hall先等我同你傾電話啦。

 

「我返到去再打比你啦。」我續道：「你乖，比心機溫書先啦。」

 

「嗯。你返去hall既時候都小心啲。」Jenny叮囑我。

 

「冇問題既，我地而家一大班人響埋一齊。」我繼續講大話，同佢講一大班人一定安全啦：「我返到hall即刻打比你。」

 

「嗯，知道。咁我都比心機溫書先了。」Jenny終於肯cut線~

 

要溫書就唔好講咁多電話啦～

 

…

 

呢句我唔夠薑講…

 

「總之，攰就休息下。有咩就打比我啦。」

 

「知道。愛你呀老公。」Jenny道別。

 

Jenny可能溫書溫到好攰。我都應該體諒下佢。

 

唔知各位巴絲會唔會好似我咁。我唔介意成個人實體陪Jenny，但係我唔鍾意同佢傾電話，唔鍾意果種連小小私人時間都冇埋既感覺。

 

不過，有時都要遷就下另一半既。

 

「我都愛你。」對住Jenny作出愛的宣言。

 

「嗯…拜拜…」

 

（待續）