三
趁住食完飯沖完涼又未開始入房會合我啲組員，就梗係盡下好男友既責任向Jenny報個靚到。
嘟...嘟...「衰人! 肯打黎喇咩？」Jenny一接個電話就話下我, 不過語氣其實都係撒下嬌。
「錫返~咁我玩O camp唔得閒吖嘛，轉過頭又要再玩啦，都係抽空打下比你架咋~」我氹下佢。
「算你喇~個camp好唔好玩呀？」Jenny問。
「Ok喇! 不過好攰呀…哎呀，組爸催我喇，唔講住, 再傾~」唔係組爸催，係我吹(水)~難得黎到camp梗係唔想傾咁耐電話, 平時仲傾唔夠咩～
「吓，咁快...」想像得到Jenny又扁扁咀...
「冇計啦，再傾~bye~」我好賤咁好快cut左線。
呼~真係可以抖一抖喇。
響呢個時候, 我先發覺原來附近企左個人。啱啱洗完頭濕濕地既長髮, 深深既酒渦，原來係阿冰。講起黎，呢次好似先係我同阿冰第一次單獨相處。
「Hi阿冰, 咁啱既?」我向佢打招呼, 唔知佢啱啱聽唔聽到我同Jenny傾電話?
「Hi!」阿冰古古惑惑咁望一望我:「啱啱同女朋友傾電話?」
「係呀。」我有啲尷尬咁R一R個頭。佢好似真係聽到晒咁。
「好賤呀你~」阿冰仲係keep住個古惑樣, 指一指我:「咁樣cut你女朋友電話~」
「情趣既野你識條鐵咩！」好啦，我承認其實呢啲唔係咩情趣。「喂～我就話要報到所以唔入去住啫，你又唔入房玩住先?定你又要報到?」講開呢樣野, 又等我順水推舟chok下阿冰有冇男朋友先~
不過有又點冇又點? 其實都唔係好關我事~
「哈…我果個唔會要求我每分每秒都報到架!」阿冰答。噢，即係有男朋友喇。唔知點解有小小失望添! 不過見到靚女比人occupied左我諗係男人都會失望既。
「唉...今日比Simon爸爸佢地圍住我其實搞到我有啲攰...」
我今日見到佢有小小手忙腳亂都估到佢唔係好擅長應付咁多男仔圍架喇，不過又估唔到佢會同我講。可能都想搵人呻下呱?
「係咩？我仲以為你平時都比仔圍慣添!」仲諗住阿冰咁靚女平時有比狗公圍都好正常...所以我對佢今日既反應有啲意外。
「點解你會覺得我成日比男仔圍住呢？」阿冰眼斬斬咁望住我。
大佬，你照下鏡喇，你真唔知定扮唔知呀…
「我以為你咁靚平時應該好受男仔歡迎添...」我食左誠實豆沙包咁衝口而出咁講...
阿冰塊面好似突然紅左一紅，呆一呆咁望住我。
咦，其實我係咪講得太直接? 話晒其實我同佢都唔係好熟, 不過傾開計又好似幾啱傾啫...佢會唔會當埋我係其他狗公既一份子? 冤枉呀包大人, 我淨係咋。
「呀，唔好誤會, 我有果句講果句，有怪莫怪, 細路仔唔識世界~」我耍晒手又擰晒頭咁解釋。
阿冰望一望定我手fing fing頭擰擰咁既樣, 突然噗哧一笑:「你真係好搞笑~」
咦，其實呢句係咪笑我戇鳩？不過算啦，我諗我而家個樣都真係幾戇鳩。
「咦，阿威阿冰?你地響度做咩？」阿熙把聲突然出現!
我擰一擰轉頭就見到佢個童顏樣。
「你做咩好似死傻仔咁郁黎郁去?」阿熙望住我雙手亂fing既樣咁樣問我。以啱啱識左冇幾耐黎講, 呢個阿熙咁講野其實算唔算毒舌?
「冇...冇呀？」不過佢既出現都叫做解一解困左呢個有小小尷尬既moment...「我地準備去玩房game咋嘛。」
「啱喇，咁一齊行啦。」阿熙繼續講:「仲有你條友仲爭我一樣野呀。」
唔通佢指既係比我同Jenny既合照佢睇？條友又會咁好記性既。
「爭咩呀？」我詐傻扮懵。
「相呀頂你。又話比我睇你同你女朋友既合照。」阿熙答我。
又會咁堅持既，男仔黎講阿熙都算幾八卦。
「哎…好啦…」今次避唔到架喇，唯有拎個電話出黎，諗住show下入面啲合照比佢睇。
「woo...用iphone, 有錢仔~」阿熙見到我部電話就咁講。
「講呢啲。」我拎起部電話㩒㩒㩒，對住阿熙show一show左張我同Jenny好hea咁影既合照。
「咩黎架?我又睇~我又睇~」阿冰彈彈下咁彈過黎湊熱鬧~
「冇，睇下個死傻仔同佢女朋友既合照啫~」阿熙又漫不經心咁講。
「嘩~又幾襯喎~~~」阿冰又湊個頭埋黎望一望。一講起呢啲阿冰似乎好感興趣~
「係咩…Ok啦…」唔知點解其實我唔係好想比阿冰睇到。「你睇左我果個到你要比返我睇啦！」等我又黎一招順水推舟先~
阿冰擰轉頭扮聽唔到~衰妹吖。不過我都唔會堅持既。
我地三個一路傾一路行終於去到間房, 原來都差唔多齊人, 除左我地果組之外仲有幾個可能係student helpers咁既物體。
房games其實都係果啲乜鬼朱古力波, MC killer果類啦～其實都幾好玩, 呢一刻先至最有入camp feel!
玩下玩下...
大家又有啲攰，又變左傾計大會。一開始大家都係傾下閒計, 又或者係無聊中學雞野...
閒談之間得知原來阿冰成個中學生涯都係讀女校, 唔怪得知佢好似唔係好慣比仔圍咁喇。唔知佢同佢男朋友係點識既呢？
傾下傾下...
「不如大家講下你地有冇拍拖吖!」獸父Simon黎料~睇佢眼甘甘咁望住阿冰, 其實佢都係想問下阿冰有冇拍拖啫~
阿冰其實應該望到獸父Simon望住佢殷切既目光, 不過佢可能唔想講又或者至少唔想做第一個應機, 所以好似扮望唔到既目光咁。
我係咪應該呢個時候衝出黎英雄救美幫佢擋一下做第一個出聲先呢？不過講有冇拖拍呢味野其實都有啲老尷...
就響我十五十六諗緊幫唔幫阿冰擋一擋既時候, 一把雄厚既聲音突然響起。
「um...我呢，就都拍過5, 6次拖架喇，不過呢，而家就冇拖拍，但就隨時準備開始一段新戀情架喇!」呢把聲既主人屬於一個叫阿賢既組仔。阿賢係個典型肥仔，中間分界髮型，金絲眼鏡, 仲要滿面油光...話佢有拍過拖都冇人信, 仲要話拍過成5, 6次拖...
但又咁講, 雖然佢個樣好毒, 但今日同佢相處落其實佢個人都幾外向, 又幾鍾意撩人傾計, 同佢毒毒既外表完全唔同。好似呢一刻咁，其實佢講呢番說話果陣係好自信爆棚，而且又笑笑口講出黎。
「係喎，你咁靚仔又咁有型，我仲以為你起碼拍過10次8次拖添!」阿熙一副諷刺既表情咁寸肥仔賢。
「係咩？其實好多人都咁講, 哈哈...」肥仔賢那來的自信...
又好彩肥仔賢唔知醜咁認屎認屁，又加埋阿熙又潤一潤佢，大家笑左一餐之後好似對呢個話題開放左肯講左。(又或者其實大家本身都係八八卦卦咁。)
我唔知其他人係咪是旦噏，不過我自己就好坦白咁講真話:「我? 我有拍拖呀。有個拍左3年幾既女朋友。」
「3年幾都幾長喎~你地點識架?」估唔到阿冰又對我八八卦卦咁喎，係咁問我。
「冇呀，咪同班同學, 大家又鍾意大家咪響埋一齊囉～」我答得好行。不過事實係我同Jenny既愛情故事真係好平凡, 個個中學雞都係咁架喇。
「唓，答得咁行架~」阿冰答返我。
「中學雞個個都係咁架啦～」我答。
「係喎，咁冰冰你呢？你都未答。」哦, 獸父Simon終於忍唔住要指名道姓咁要阿冰答。仲有, 做乜鬼突然叫佢冰冰咁懶係親切呀？冰冰係你叫既咩！
「我? 有呀。」阿冰好大方咁答。
「哦, 係咩。」獸父Simon表情上好快咁閃光一絲不悅。「有冇相睇下呀～」
「係囉係囉～有冇相睇下呀？」
「我又想睇下佢咩樣呀！」
成間房既狗公(但唔包括我同阿熙)一擁而上圍住阿冰, 場面非常有趣!
阿冰比呢個突如其來既情景搞到有啲不知所措，尷尷尬尬咁，比又唔係, 唔比又唔係~
呵呵…又到我英雄救美既時間喇...講笑咋，我其實係想坐享其成, 等佢地搶到幅相之後先扮八卦去睇，咁就唔會好似咁狗公啦～
我望一望阿熙，條友好似食緊花生咁，好好笑。
(待續)