十六
今日係一個風和日麗既好日子，最適合就係踢波。
我同阿熙由hall出發，好快響學校個canteen食個早餐，之後好快就到左球場。
雖然我地讀既嶺大係細，但係所有設施都好齊全，連個自己既十一人仿真草足球場都有，真真正正就係麻雀雖小， 五臟俱全。
而呢個仿真草足球場，離main campus都好近，行過去都唔駛5分鐘。
我地行到入足球場既正門，已經聚集唔少睇黎係參加選拔既freshmen，同埋一啲著住校隊波衫既校隊成員。後者應該係黎幫手吧。
我同阿熙響hall果陣已經換左衫踢住拖拎左個袋就咁出發，所以而家其實只要換返好對襪同波砵就ok。
望住阿熙全副武裝咁既樣，我又諗起暑假去參加果啲麥○勞暑期足球訓練班既小朋友。
好想笑。
換完衫之後我地就去搵個拎住點名紙既老鬼點名。
「你好，我係足球隊既隊長，叫我阿東得啦。」眼前呢個黑黑實實大大隻隻，一頭短髮既男仔自我介紹。
「你好呀，我係梁建威，唔該。」我點名。
「余正熙，唔該。」難得阿熙咁有禮貌。好唔慣呀！
「Ok, 你地自己熱下身先啦，轉頭會有分組比賽。」隊長阿東同我地講。
「唔該。」
就響我地轉身想行開果陣，突然聽到有把中佬既聲:「熙仔！」
阿熙擰轉面，一面驚訝咁望住個肥肥地禿禿地既中佬:「陳sir?」
呢個似係教練既陳sir話:「真係你！啱啱離遠已經見到你，不過我地都幾年冇見，仲諗緊會唔會認錯人添！」
阿熙露出懷念既表情，說道:「都有4，5年啦…係呢陳sir你響度既？」
陳sir答:「我而家響度做教練呀！我先估唔到你真係考左入大學，入左黎呢度讀書！」
阿熙話:「總之都叫做入左大學，都叫冇做錯到決定…」
陳sir話:「人各有志，見到你達成自己目標就好。一陣睇下你表現啦，睇下有冇生疏到。你熱身先啦！」
「好，轉頭見~」全程阿熙都好有禮貌，唔…不如話係敬意。
陳sir行開左之後我忍唔住問佢:「你識教練？」
「嗯，佢算係我踢波既其中一位恩師。」阿熙一本正經咁答。
我開始有小小要重新打量阿熙既感覺，不過咀上都係不饒人:「唔好靠關係入選呀～」
阿熙又擺出果副冇你咁好氣個表情，話:「一陣唔同隊既話你就知味道！數撚死你條仆街。」
「哈哈，好驚呀我。」
*
選拔開始了。
其實主要係將啲黎參加選拔既學生分組比賽。而我同阿熙就分左響唔同既隊伍度。
都好，你踢前鋒我踢中堅，就等我睇下你咩料。
第一場比賽唔係對阿熙果隊，我覺得自己叫做表現得唔錯啦，至少我生得夠高同都叫有點肌肉，加上對面既前鋒又唔係好識搶點頂波但又唔知點解佢啲隊友又亂咁斬啲高波入黎，簡直係比機會我表演。
不過我果隊又好似冇乜好既進攻球員，最後我地呢場大家都入唔到波，就咁完左場。
順帶一提，呢個選拔既形式唔係淘汰賽，所以之後仲會有機會再踢。
完左場之後阿熙走埋黎，同我講：「你條冚家剷又幾頂得喎。」
「駛乜講~」我認屎認屁~
之後到阿熙果隊，本來我想留響到睇下呢個小朋友踢成點，點知突然之間急屎，唯有即刻去更衣室度解決，廢事忍到一陣間再比賽果陣響球場度瀨出黎。
屙完出黎之後阿熙果場已經踢完，就咁睇佢個表情同佢果隊啲氣氛似乎佢果隊應該贏左。
睇唔切添。仲諗住睇下阿熙咩水平添。
之後等多左陣又到我地果組出場，今次仲要係對阿熙果隊，今次直接同阿熙交手，似乎真係可以佢係咩料喇。
「等我陣間剷死你。」開波之前我搭住阿熙膊頭咁講。
「哈，睇下點！」阿熙好有自信咁講。
好，有自信，我鍾意。
*
我諗有小小後悔點解唔一早響hall試下屙完屎先出黎。
咁樣既話我至少可以睇左阿熙果隊波既表現。
唔係，應該話係可以睇到阿熙既表現先啱。至少可以響心理上面做好小小心理準備。
佢果隊完全係一人球隊。阿熙既球隊。
大家一樣係未夾過，但係阿熙好自然咁融入左球隊之中。應傳則傳，應扭則扭，應射則射。
我幾次1 on 1對住阿熙，冇一次可以成功阻止到佢，係一次都冇。對住佢，就好似陳偉豪對住美斯咁，完全比佢舞龍咁舞。
我比阿熙玩到氹氹轉。唔好話剷鳩佢，我連佢波皮都掂唔到。
原來佢咁撚勁。
結果短短20分鐘入面比佢一個人連中三元。
唉，其實係我睇小左佢。
明明自己其實都唔係勁，但係就仲要睇小人。
自己究竟衰乜野？正如江華同阿舜所講:你太有自信喇。
古乳有暈：毒L最忌有自信。
究竟是那來的自信。
難得地阿熙完左場冇走黎寸我，淨係拍一拍我膊頭。
之後我仲有一場分組賽，我諗我地後防表現都算ok喇。至少今次又係全場受壓但係我地冇失波先。不過班負責進攻既隊友又係好似唔識攻咁，最後又係0比0。
踢晒3場比賽，一和二負，冇入過波。
足球係十一人既團隊比賽，成隊波咁既表現，就算我地後防球員表現係點都好，一和二負0入球係不爭既事實。
再加上我自己響第二場比阿熙撚狗咁撚，出盡洋相，我真係冇信心自己可以入選到校隊。
（待續）